Kalbaryo ni Mike Rama

Matod pa sa mayor, sa imaging katuigan, di gyud malangan ang pundo alang sa Buhing Kalbaryo kay gibutang ang maong proyekto ubos sa culture and arts

IPADAYON ni Cebu City Mayor Michael Rama ang ika-17 nga edisyon sa “Buhing Kalbaryo” sa umaabot nga Semana Santa bisan wa kini gahini og pundo sa konseho sa syudad sa Sugbo.

Ang Buhing Kalbaryo mao ang linawas nga pasundayag bahin sa katapusang mga adlaw ni Hesukristo, sa pagsakit kaniya, sa paglansang kaniya sa krus ug hangtod sa iyang kamatayon.

Apan ang budget nga P475,000 alang sa Buhing Kalbaryo maoy unang gilan

sang sa konseho. Ang konseho nga gikontrolar sa Bando Osmeña Pundok Kauswagan mao karon ang labing dakong kalbaryo ni Mayor Mike Rama.

*** Ang maong budget adto unta i-charge sa pundo gikan sa Philippine Amusement and Gaming Corp. (Pagcor).

Apan gikuwestyon kini ni Konsehal Margarita Osmeña, pangulo sa committee on budget and finance sa konseho kay ang mga kalihokang relihiyuso wa man mahilakip sa mahimong gastohan sa pundo gikan sa Pagcor.

Mahimong gastohan niini ang mga self-sustainable livelihood projects, scholarships, infrastructure projects alang sa komunidad ug sa panglawas.

Kon mao kana ibutang na lang kini nga livelihood project sa mga artista nga moapil sa Buhing Kalbaryo.

*** Matod pa sa mayor, sa miaging katuigan, di gyud malangan ang pundo alang sa Buhing Kalbaryo kay gibutang ang maong proyekto ubos sa culture and arts.

Lahi ra kon panahon sa eleksyon. Pangitaan gyud og paagi nga mabalda ang iyang mga proyekto.

Mao nga adto na lang modangop si Mayor Mike Rama sa mga supporter sa Buhing Kalbaryo.

Kuyaw sab nga mosugot ang konseho sa paggahin og pundo pero ang mayor maoy ipalansang.

*** Nibahad ang Police Regional Office (PRO) 7 nga ilang dakpon ang mga tawo nga magpasiugda sa mga bikini open atol sa Semana Santa.

Gihulagway sa mga opisyales sa kapulisan nga malaw-ay kining maong mga kalihokan ug nahisupak sa Revised Penal Code. Busa maayo na lang likayan sa katawhan, ilabi na didto sa isla sa Bantayan.

Pero di dakpon kadtong magsul-ob og bikini sa baybayon o beach.

Apan unsa may buhaton sa kapulisan kon di magsul-ob og bikini?