Let my feelings out

(Ikalima sa pito ka mga gula)

NAGTINAN- AWAY mi si Dina human makasulti si Lorna. Kalit nga nahanaw ang kalipay ni Dina, nagkusmod siya. Samtang si Lorna nagpadayon sa gibating kalipay. “Kanus-a lang magsulti si Jhead nga manuroy mo, Lor?” Gusto kong siguruon ang gipahibawo ni Lorna.

“Karon lang gyud. Gitawgan ko niya sa selpon. Di man gani ko mopauli unyang hapon sa Danao. Adto ko matulog sa akong uyoan sa Escario.”

Mitan-aw ko kang Dina. Mikulismaot ang iyang nawong. Morag nauwaw siya nako. Unsaon, nagsugilon man siya nako nga

boyfriend na niya si Jhead. “Ang kanahan, lumpungon diay ta niya, Lorna!” Masuk-anon si Dina. Nahibulong si Lorna sa gisulti ni Dina. Ang iyang nawong na sab ang mikulismaot. “Kay ngano man diay, Dina?” Nagpaminaw na lang ko sa panagsulti ni Lorna ug Dina. Gipasagdan ko sila nga mopagawas sa ilang gibati. “Madalag ngano, Lorna!” Nagpakahilom gihapon ko samtang nagsugid si Dina kang Lorna bahin nilang Jhead. Morag kahilakon si Lorna pagkahuman og sugilon ni Dina. “Salbahis tawhana. Di kasaligan!” “Kon di pa sala sa Dios, kaayo gyung tungluhon anang Jhead, uy!”

Hasta pud si Dina, kahilakon. Namuwa ang iyang mga mata. Nakasabot ko sa gibati sa duha ko ka amiga. Naluoy ko nila. Unya nahiabot si Sharmain. Malipayon kaayo.

“Ako gyud ang love ni Jhead. Nagtawag siya nako sa selpon karon. Makig- date siya nako ugma.”

Nakapanghupaw ko sa gisugilon ni Sharmain. Gitan-aw ko si Dina ug Lorna. Nagpanglingo ang duha. Nakapangawot ko sa akong ulo. Husto ko sa akong desisyon nga likayan si Jhead. Maayo ra gyud nga giatras ko ang akong love niya. Pero wa gyud ko magdahom nga buhaton ni Jhead sa tulo ko

ka friends ang paglumpong nila. “Hoy, naunsa man mong tulo? Wa pa gani Holyweek pero nag-Biyernes Santo na kanang inyong mga nawong?”

Nahanaw sa nawong ni Sharmain ang gibating kalipay. Maoy mipuli ang kahibulong. Unya kay wa mang magtingog si Dina ug Lorna, ako ang misugilon kang Sharmain sa tanang gibuhat ni Jhead.

Wa katingog si Sharmain. Kahilakon siya. (SUMPAYAN)