Notebooks ipang-apod-apod apan tangtangan sa cover

IPADAYON sa Kapitolyo ang pagpang-apudapod sa school supplies apil na ang kontrobersiyal nga mga notebook nga dunay mga hulagway ug pangan sa mga opisyal sa lalawigan sa Sugbo sa dili pa magbukas ang klase sa Hunyo.

Apan tangtangon ang cardboard cover sa atubangan ug luyo sa mga notebook base sa sugyot ni Provincial General Services Office acting head Eva Encabo ngadto kang Acting Governor Agnes Magpale.

Sa audit observation memorandum, ang Commission on Audit (COA) nagkanayon ang pagpalit sa mga school supplies nakalapas sa “procurement process.”

Matod sa komisyon kalapasan sa DILG Memorandum Circular No 2010-101, ang pagbutang sa mga hulagway ug pangan sa mga elected official sa mga notebook labi pa kay nagsingabot ang piniliay sa Mayo.

Ang COA nidugang nga kala- pasan usab kini sa COA circular 2012-003.

“Our inspection of the items disclosed that the school kits bore the names and images of the elective officials of the Provincial Government,” nagkanayon ang memorandum nga pinetsahan og Marso 7, 2013 nga giandam sa audit team leader Atty. Eva Cabrera ug Atty. Charlita Leopoldo.

Makita sa mga notebook ang mga hulagway ug pangalan nila ni Garcia, Magpale ug anhing bise gobernador Greg Sanchez ingon man mga miyembro sa Provincial Board.

Si Magpale niklaro nga wa sila’y kalibutan nga naapil ang ilang mga hulagway sa mga notebook nga iapudapod unta sa mga tinun-an sa mga pampublikong tunghaan sa lalawigan sa Sugbo sanglit wa kini moagi nila.

“Wa mi kalabutan ana ha. We did not know nga apil among pic- tures ana kay wala na moagi diri,” padayag ni Magpale dihang nahinabi sa mga sakop sa media kagahapon.

Matod niya ipadayon nila ang pag-apudapod sa mga notebook apan tangtangan na kini og cover sa atubangan ug luyo.

Sa kinatibuk-an, nagkantidad og kapin sa P19 milyones ang mga school supply nga wala maapudapod ngadto sa mga beneficiary nga mga tinun-an nga nakapondo lang sa mga bodega sa Kapitolyo labi na sa Cebu International Convention Center.

Si Garcia unang nipasabot nga wa dayon maapod-apod ang school kits tungod kay ulahi kini nga nadeliver sa supplier.

Iyang gikwestiyon kon nganong siya lang ang gi- single out sa COA nga anaa man usab ang mga hulagway ug mga pangan sa ubang mga opisyal sa Kapitolyo.