Olango gibutangan og MRF sa City Hall

BISAN pa man nga di problema ang basura sa isla sa Olango, sakop sa dakbayan sa Lapu-Lapu, gisiguro sa Siyudad nga kabutangan kini og kaugalingon nga material recovery facility (MRF).

“Ang guwa ana, ato lang gyud nga gituman ang R.A. 9003 (Ecological Solid Waste Act),” matod ni Mayor Paz Radaza atol sa regular press conference sa miaging adlaw.

Nasayran nga moabot sa P2.5 milyones ang gitagana nga budget sa proyekto nga nahimutang sa Barangay Santa Rosa, sulod sa 230 nga metro kuwadrado nga luna.

Ang MRF adunay dumptruck nga maoy mili bot sa walo ka mga barangay sa isla aron sa pagkolekta sa mga basura.

Gibutangan usab og shredder nga mopino niadtong mga non-biodegradable nga basura nga maoy gamiton unya nga sagol sa paggama og mga hollow blocks isip kabahin sa livelihood project sa mga residente gawas sa pagpangisda.

Nagkanayon ang mayor nga aduna nay mga sakop sa Solid Waste Management office gikan sa City Hall ang gipadala sa isla aron maoy mobansay-bansay sa mga mga tawo nga modumala sa operasyon sa MRF sa Olango.

Sa laing bahin, usa ka mini-Hoops Dome gisugdan na sa pagtukod sa Olango nga nahimutang tupad sa mini-city hall nga adunay kinatibukang gilapdon nga 1,215 metro kuwadrado.

Ang Siyudad nigahin og P15 milyones alang sa maong proyekto ug giatbangan og P3 milyones sa Department of Public Works and Highways sa paggama sa stage.

Gibana-bana nga moabot sa 500 ngadto sa 600 ang seating capacity sa maong facility nga gisugdan na og tukod ang stage.