Way bite center

NAGTUKOD og mini- lyon nga kantidad sa city plaza ang Talisay apan wa kini animal bite center aron moatiman sa mga mapaakan sa iro.

Kini maoy bag-ong pagsaway ni Liberal Party (LP) mayoral candidate Johnny Delos Reyes human si Cebu 2nd Engineering District chief Daisy Toledo nibutyag nga P24.5 million ang gasto sa city plaza.

Matod ni delos Reyes nga ang siyudad lahi og mga prayoridad ug gikalimtan lang ang pagpamalit og anti-rabies vaccines alang sa Talisay District Hospital.

Nasayran ni Delos Reyes nga ang mga taga Talisay nga mapaakan og iro adto mopahimus og serbisyo sa Minglanilla District Hospital tungod kay sila man ang dunay Animal Bite Center.

“Paibogon raman ta anang P24.5 million dayon ang mga kabus maoy maglisud,” matod ni Delos Reyes.

Apan si Konsehal Richard Francis Aznar, chairman sa committee on health sa konseho, nagkanayon nga angayan sab nga masayod si Delos Reyes sa tinudanay nga sitwasyon.

Giangkon ni Aznar nga ang Talisay District Hospital di makahatag og anti-rabies vaccines sa mga mapaakan og iro apan ang siyudad ang nag-abaga sa unang duha ka dose sa injection sa Animal Bite Center sa lungsod sa Minglanilla.

Si City Health Officer Lino Alanzado nitug-an sa Sun.Star Superbalita nga way trained personnel ang district hospital alang sa Animal Bite Center apan giabaga ang duha ka higayon nga pagpa- injection.