Sunod title defense ni Casimero posibling anhi sa Sugbo himuon
HUMAN sa lain na usab nga malampusonng pagdepensa sa iyang titulo sa niaging Dominggo didto sa Panama City, Panama, tinguha karon sa kampo ni IBF light flyweight world champion Johnriel Casimero nga anhi na Sugbo ipahigayon ang sunod niyang pagdepensa.
Atol sa press conference kagahapon sa Park Mall, ang promoter ug business manager ni Casimero nga si Sammy Gelloani mibutyag sa mga tigbalita nga ila karon lihukon nga makadepensa ang 23-anyos nga lumad taga Ormoc City dinhi sa Pilipinas.
“Yes, we are bringing Casimero’s next fight here in the Philippines, particularly in Cebu. We’re looking for a television network that could work with us in this project,” matod ni Gelloani.
Si Junpe Castillo, ang presidente sa IPI nga maoy nag- manage sa boxing career karon ni Casimero, abli sa maong proposal ni Gelloani. Kini posibling mapahigayon sa bulan sa Hulyo o Augusto.
Si Casimero, sa iyang bahin, mihangop sa laraw ni Gelloani. Gusto usab niya nga makadepensa sa iyang titulo atubangan sa iyang mga dumadapig.
“Nindot na og madayon. Ganahan ko nga anhi dinhi akong depensa. Pero og di madala, komportable kong moaway bisan og asa,” padayag ni Casimero.
Niadtong Dominggo, nadepensaan ni Casimero ang iyang titulo pinaagi sa unanimous decision nga kadaugan batok sa hometown hero sa Panama nga si Luis Alberto Rios. Kadto maoy iyang ikaduhang pagdepensa sa titulo.
Wa usay plano si Gelloani nga paawayon si Casimero sa usa ka unification bout ilabi na batok sa laing Filipino world champion nga si Donnie “Ahas” Nietes sa Ala Boxing Club.
“No. It does not look good for Philippines, Filipino champion fighting against Filipino champion. And we’re not even planning for a unification fight. We want to defend this title longer,” padayag ni Gelloani.