HEAT 24-0 NA
James wala kapugngi; 27 puntos nga labaw sa Cleveland gipapas sa Miami
GISALBAR ni LeBron James ang sunodsunod nga kadaugan sa Miami Heat kagahapon nga nag-ungaw na gyud unta sa peligrusong dapit.
Sa tinguha nga di pa gustong maputol ang ikaduhang pinakataas nga sunosunod nga daog sa kasaysayan sa NBA, si James nangulo sa Heat aron papason ang 27 puntos nga labaw sa Cleveland Cavaliers ug kuliton ang makutas nga 98-95 nga kadaugan batok sa team nga iyang gibiyaan, tulo ka tuig ang milabay.
“That guy right there doesn’t want to lose in this building,” matod sa iyang teammate nga si Dwayne Wade nga nagpanglingo nga miduol kang James.
Ang mga fans sa Cavaliers nangasuko ni James sa dihang mitapon siya sa Miami sa iyang pito ka tuig nga kontrata.
Ang Heat aduna na karoy 24 ka sunodsunod nga daog ug siyam na lang ang ilang gikinahanglan aron matupngan nila ang 33 nga record sa Los Angeles Lakers niadtong 1971-72.
Daghan ang nagtuo nga ang maong record sa Lakers lisod nang papason apan sa gipakita sa Miami karon daw sa padulong na kini nilang makab-ot.
Si James kinsa mitali og 25 puntos ug ang iyang mga kauban miinsister nga wa sila mag-apas sa maong record.
Tuod man sulod sa 30 minutos daw sa nakita ang ilang way interest niini human sila mabiyai sa Cavaliers, 67-40, sa katapusang 7:44 sa third quarter.
Apan ubos sa wa kapugngi nga James kinsa midugang og 12 ka rebounds ug 10 ka assists sulod sa 42 minutos, ang Heat hinayhinay nga misikit ug di pa igo ila pa kining gipapas aron sakmiton ang kadaugan.
“This was one of the most bizarre, unique days of my life with everything that happened,” ingon ni James.
Buot ipasabot ni James mao ang wa damhang usa ka fan nga midagan lang og kalit tunga sa korte ug ang pagkadelatar og 35 minutos aron masugdan ang duwa tungod sa naguba nga scoreboard.
“It also was one of the best comebacks I’ve ever been a part of,” dugang niya. Sa fourth quarter lang, si James mitali og 14 puntos, pito ka rebounds, tulo ka assists ug duha ka steals nga maoy nagduslit sa dakong rally sa Miami.
Sa kadaugan, naapsan sa Miami ang record sa Houston Rockets nga 23 ka sunodsunod nga daog niadtong 2007-2008.
“I knew there was a lot of time, so we never panicked,” pa
napos ni James. “We were down 27 with 18 minutes left. That’s a lifetime in basketball.”