MVP teams batok SMC squads sa PBA karong gabii

5:15 pm. Petron vs. Talk ‘N Text 7:30 pm. Ginebra vs. Meralco

SUBHAN sa Petron Blazers ang ilang bag-ong import nga si Rodney White karong gabii sa ilang pagpakigbatok sa Talk ‘N Text Tropang Texters (4-4) sa nagpadayon nga PBA Commissioner’s Cup sa Araneta Coliseum.

Si White, 32, kinsa nakaduwa na sa Barako Bull kaniadto, maoy puli sa banned nga si Renaldo Balkman human kini nagmaoy ug nanuok sa iyang kauban nga si Rodney Santos sa niaging semana.

“I’ve been playing ball professionally for a while and there are not too many new plays I haven’t seen before. Basically, we started out pretty simple, so it’s just a matter of adjustment,” matod sa 6-9 nga White.

Ang Boosters lab-as pa sa ilang makasurprisang kadaugan batok sa Rain or Shine Elasto Painters, 87-89, bisan pa man og miduwa kini nga walay import.

Sa maong duwa, ang Sugboanong rookie nga si Junmar Fajardo maoy nahimong mahait nga hinagiban alang sa Boosters kinsa anaa karon sa ikaduhang puwesto nga may 6-2 nga baraha.

Laing panagsangka tali sa MVP ug SMC franchise ang masaksihan usab sa main game nga sugdan sa alas 7:30 sa gabii.

Ang Barangay Ginebra (3-5) nga mipupo na og sunodsunod nga kadaugan ubos sa ilang bag- ong import nga si Vernon Macklin makigsakbang sa Meralco Boltz (4-4).

“Both teams can’t afford to put their guards down. Each one can’t blink,” matod ni Boltz coach Ryan Gregorio. “It’s dangerous to play Ginebra now with their confidence level oozing. That’s why steps will be taken to limit Mark Caguioa, LA Tenorio and the highlight reels of Vernon Macklin.”

Nag-una man tuod sa standings ang Meralco apan napildi kini sa ilang uwahing duwa samtang ang Kings mipupo og mga kadaugan sa uwahi nilang duha ka mga duwa nga maoy nagpataas sa ilang moral.

Lakip sa gipangbiktima sa Ginebra mao ang defending champion San Mig Coffee ug ang Talk ‘N Text.

“Dalawang malaking isda yung nahuli namin. Nasa-cellar pa rin kami pero dikit-dikit naman. We just have to keep on winning,” padayag usab ni Ginebra coach Alfrancis Chua.