Estudiyante sa Banilad HS kampiyon sa Super B 9-Ball

GIBUNTOG ni Aaron Doria sa Banilad High School sa Mandaue City si Jayson Dominguez, 7-4, kagabii aron angkunon ang korona sa high school division sa 2013

Sun.Star Superbalita 9-Ball Challenge sa SM City Cebu Trade Hall.

Si Doria nakabulsa og P4,000 nga ganti samtang si Dominguez nakakuha og P2,000 nga ganti isip 2nd placer.

Ang 3rd placer nga si Jeffrey Roda nakadawat og P1,000 samtang ang 4th placer nga si Jerold Dela Cruz nakakuha og P600.

Sa laing bahin, si Alvin Olayvar sa Banilad Elementary School sa Mandaue City mao sab ang mikampiyon sa elementary division.

Iyang gipatapsingan si Joey Enot, 7-6, sa kulbahinam kaayo nga finals. Ang 3rd placer ning maong kategoriya mao si Brajan Abastillas samtang ang 4th placer mao si Genesis Ouano.

Pareha ra og premyo ang elementary ug high school divisions.

Sa presstime, padayon pang gikombatihan ang championship games sa collegiate, class B ug sa gikaintapang class A.

Nagsangka sa finals sa collegiate mao sila si Junemark Alegado batok Mike Reserva.

Sa finals sa class B, sila si Vincent Doria ug Junjun Javellona maoy nag-abot sa finals.

Samtang sa class A, nagdinumbolay sila si Anthony Raga sa Cebu ug Angelo Arriola sa Manila.

Ang class A defending champion nga si Ricky Dela Zerna lakip na ang bantugang si kanhi double world champion Ronnie Alcano igo rang nakaabot sa top 8.

Nagkanayon si Chris Rodriguez, kinsa maoy nag-organisar sa kompetisyon, nga karon maoy labing dakong edisyon sa tinuig nga torneyo kon hisgutan ang kabahin sa gidaghanon sa mga nangapil ug mga tumatan-aw.

“This is the biggest turnout in terms of number of participants and the crowd. Tungod ni sa college division kay daghan og nangapil ani nga division,” asoy ni Rodriguez.

Dul-an sa 300 ka mga bilyarista gikan sa nagkalainlaing suok sa nasod ang nangapil sa torneyo, nga nagdalit og P300 nga kinatibuk-ang ganti.