Lolo lovers
USA ka bulan sukad nga nabiyudo si Lolo Teryo, nabiyudo sab ang suod niyang higala nga si Lolo Burcio. Nanghambog si Lolo Teryo nga taas ray tuig makaasawa siyag “desi” – desisayis o dili ba desisiyete o desi-otso.
Tuod man, siyam ka bulan pa lang gani nakatrato nag desi-otso anyos si Lolo Teryo. Barutay ang ngalan sa tin-edyer, tiggama og uling dinhi sa among bukid sa Kantoratoy. Dili guwapa si Barutay ug igo rang nakatapos sa elementarya. Matod pa sa mga tsismosa dinhi sa Kantoratoy, dili ikahibulong kon giunsa pagpasugot ni Lolo Teryo si Barutay kay morag danghag man ning bayhana ug dali kaayong mosalig.
“Aduna pa kahay susama ni Barutay didto sa Kantoratoy, Pre?” sukot ni Lolo Burcio. “Pagkalisod ba aning magpabilin tang nag-inusara kay ang atong mga apo nag-iyahay na man pod pagpangitag ilang kapalaran.”
“Akong sulayan pagpangutana si Barutay, Pre. Morag duna to siyay friend nga nangita pod og lover. Kuyog kanako puhon sa Kantoratoy sa dili pa ta mamista didtos ilang Basyang ug Badang sa Samboan. Pasumangil na lang pod ka nga mangumprahay kag uling inig-abot unya natos bukid sa Kantoratoy.”
Tuod man, si Barutay maoy nag- bridge aron ang suod nga higala niini mamahimong gilpren ni Lolo Burcio. Mamugha ang angga sa tin-edyer, tiggama sab og uling ug desi-otso anyos pod.
Double wedding ang giplano nilang kasal. Sa wala pa ang adlaw sa kasal, dungan nga miduaw sa lubnganan sa ilang mga kapikas ang managhigalang biyudo.
Si Lolo Teryo miingon, “Pinangga nakong Bakang (angga sa mipanaw niyang kapikas), hinaot nga imo kong hisabtan. Dili na gayud nako mabatukan ang tumang kamingaw sa pag-inusara. Sa gabii nga magbunok ang ulan, magpunay tawon kog tikungkong sa katugnaw. Walay moatiman nako kon magkurog ko sa kasakit sa akong rayuma. Sabta tawon ko, Bakang, ha?”
Si Lolo Burcio mihagawhaw, “Sakit na gyud kaayo ang akong atraytis, Yabag (angga sa mipanaw niyang kapikas, nga puwerting yabaga mokanta niadtong buhi pa). Wala na gyuy mohilot-hilot nako, walay moatiman. Ikaw man poy nagsulti sa una nga kon dunay tinuod nga mahigugma nako, okey ra nimo, kay di ka gustong magmingaw ang akong gabii.”
HUMAN sa double wedding sa Boracay sila nag- honeymoon. Apan naunsa mang pagkahitaboa, nga misumbong man kang Barutay si Mamugha.
“Age doesn’t matter jud kaha ning aong sitwasyon, Day?” matod ni Mamugha kang Barutay. “Dili kaha pensiyon ra nila ang atong giapas? Mora man god tag bulad nga kutob ra nila simhot-simhuton!”
“Dili, Day, uy. Love jud lagi ning atong nasum-okan,” ni Barutay. Taas pa bitaw ning gabhiona, ug basin magmilagro pa. Dali, balik ta sa cottage. Ato silang hilot-hiluton. Kantahan natog Bayaw Magiliw, kay basin mag- flag raising pa diay!”. “Dunay mosaludo, Day?” ni Mamugha. “Duna jud, kon magmilagro pa!” ni Barutay. Ug dungan nga nangatawa ang duha ka birhen pa gyud nga managhigalang tin-edyer.