1 KA LITRO NGA HILO GIINOM
Sa 18-anyos nga ulitawo nga naghikog; mga pulis nagdudang kabanay dunay gitagoan
NAGBUWA ang baba ug wa nay kinabuhi nga napalgan ang usa ka ulitawo human niinom hapit mousa ka litrong hilo sa ilang balay mga alas 9 kagahapon sa buntag sa Barangay Arpili, Balamban, Sugbo.
Si Niel Sillar, 18, ulitawo, way trabaho, nilagom ug nikungkong ang mga kamot samtang nagbuwa ang baba dihang naabtan sa iyang inahan nga si Amalia, 42, sa ilang balkunahi.
Ang manghod niining lalaki nga nga kapin sa tuig pa nga maoy kuyog sa balay nagsigeg hilak hinungdan nga naalarma ang mga silingan.
Mga pulis nagduda nga dunay gitagoan ang mga kabanay kay di cooperative.
Si SPO1 Jose Villarino, imbestigador sa Balamban Police nga nahinabi sa dySS Super Radyo ug Sun.
Star Superbalita nagkanayon si Amalia nibutyag nga nanglaba siya sa sapa kagahapon sa buntag.
Usa sa ilang mga silingan maoy nipahibawo kaniya nga ipasusi ang iyang anak nga gamay kay basin nataligam-an sa nagbantay nga maguwang kay nagsige og hilak.
Nakit-an sa mga silingan nga miagi nga nag-ubo sa balkunahe si Niel nga daw natulog lang samtang ang manghod nagsige og hilak.
Nagdali siya sa pagpauli tungod sa kabalaka kay wa usab ang iyang bana kay nagtrabaho.
Iyang naabtan si Niel nga nag-ubo ug nagbuwa ang baba nga nanglagom nga wa nay kinabuhi.
Ang inahan mibutyag nga niadto lang miaging buwan naabot ang iyang anak gikan sa Leyte, diin mitabang-tabang sa ilang apuhan didto.
Giingong pwerte pang lingawlingaw niini sa Lunes sa gabii nga nagsayaw-sayaw sa balay sa ilang silingan nga ingon sa way problima.
Kagahapon sa buntag nisaka pa kini sa lubi kay gisugo aron sila magtuno.
Apan si Villarino nibutyag nga naproblima sila sanglit di cooperative ang pamilya sa biktima.
Nisulti ra kini nga kombinsido silang naghikog pinaagi sa pag-inom sa Thiodan nga spray sa mangga.
“Ang text niya sa iyahang tiya, nagbalik ni nga “Tiya, uli ugma kay tan-aw nako,” dugang ni Villarino.
Way mga text nga nakuha kon unsay rason sa pagpakamatay kay gipapas ang uban niini ug wa gipakita sa ginikanan.
Apan nagtuo silang dunay bug-at nga rason ang paghikog niini.
“Among gibali-balig pangutana kon wala ba siyay uyab. Basin naguol ni. Wala man daw. Lisod mi ani nila, di mo- cooperate,” sumala pa ni Villarino.
Si Niel niingon posibling maghikog unta sa punoan sa mangga 10 metros ang gilay-on sa ilang balay kay dunay pisi nga gihigot sa sanga.
Nagduda silang gisakitan kini hinungdan nga wa niya madayon sa paghikot sa pisi sa liog.
“Gihurot ni niya ang dul-an sa litro nga para bomba sa mangga. Unya seguro pait kaayo ni, nga isog gisagulan niyag asukar, “dugang ni Villarino.