DJ Raoul mixing pleasure and hard work

Si DJ Raoul unang nailhan sa FM radio isip si “Rhythm R,” ang Cebuano discjockey nga usa sa mga pioneering sa dance music mixing sa dekada `80 ug `90. Ang iyang talagsaong gugma sa mixing nagsugod sa pagsalmot niya sa mga dance competition sa dihang elementary pa siya, hangtod nga nidaug sila sa iyang manghod nga si Susan isip “Disco King and Queen” sa national dance competition sa Manila TV show nga “Discorama” nga gi-host ni anhing Bobby Ledesma (of Student Canteen fame). Si DJ Raoul civil engineer by profession apan mas gipili niya ang gilukso sa iyang dugo. Karon, atong kumustahon kon asa na siya gipadpad sa kapalaran human sa kapin sa duha ka dekada niya sa industriya. DJ Raoul Buno, Super Ka!

Diin ka nagsugod sa imong pagka-discjockey?

Sa Penthouse 11, kadtong ibabaw sa Sky View Hotel (also known as Luym Bldg.). Ila kong gikuha way back 1987 as a spinner and disco mixer. Mao gyud nay akong forte. Ang akong pagka-DJ maorag nadala na lang pud sa akong pagkahilig sa mixing.

Nganong niabot man sad ka sa Penthouse 11?

Tungod sa sayaw-sayaw namo ni Junjet Primor (Cebu’s top choreographer) kay naa man didto ang GMA-7 nag-office pa sa una. Hangtod nakaila nako ang mga staff sa Penthouse 11. Kay didto man ko magyampungad inig kahuman sa show kay ganahan lagi kaayo ko maminaw’g music.

After Penthouse 11 diin man ka napadpad?

Gikuha ko ni Peter Max sa dyXL (now I-FM) under the umbrella of Mike Enriquez (now GMA7’s popular news anchor) nga mao pa’y boss namo sa una sa RMN (Radio Mindanao Network). Dinhi ko nailhan sa akong icon nga “Rhythm R”. Akong contemporaries silang Jo Jammer nga tua na sa Canada nag-base karon, silang Naughty Dundee, Ric Ryan, Harry Harrison, Mighty Might, Sexy Susan, Johnny Kawa. From dyXL, I moved to Home Radio, then UR-105, Love Radio, Club Radio…

Kanus-a tong nakadaug mo sa imong sister sa national dance competition sa Manila?

I think first year college pa ko ato. We won as the National Disco King and Queen sa “Discorama” sa GMA-7. Si Junjet mao sad nay contemporary nako sa sayaw. Si Junjet choreographer sa Adelante Dance Troupe sa Colegio de San Jose-Recoletos pa na sa una while ako mao say choreographer sa Dramatics Guild.

Wa ka mopadayon sa imong pagka-dancer?

Wa na kay ang akong passion nabalhin man sa mixing. Nagtrabaho bitaw ko sa una kay licensed civil engineer man pud ko pero dili man ko happy. Mas ganahan ko mag-mix-mix og music. Dili ko kamao mokanta pero kamao ko maminaw. Dili man sad ko kaingon nga mag-spinner na lang ko for my entire life kay daghan man sad og opportunity ning trabahoa.

Asa diay ka nag-work karon?

At present, I’m the production supervisor and music and entertainment director in Brigada 93.1 News FM (formerly Smash FM). This is the only radio station in Cebu that covers and delivers news 24 hours a day. I’m also the resident DJ in “93rd and 1st Resto” in Ayala Terraces.

Unsay air name nimo sa Brigada?

“`Ul Bhonz”, it’s short for Raoul Buno, my real name. Pero ang “Rhythm R” mao gyud toy trademark nako. By the way, starting Monday (Sept. 30), magsugod na ang among bag-ong programa nga “Pica-Pica” with me and Jessica Hye, from 12 noon to 2 p.m. It’s a talkshow nga magdala og comic relief sa atong inadlaw-adlaw nga pagpanikaysikay sa kinabuhi.

Pero ang uso karon kay tambag-tambag no?

Amo na man sad nang gibuhat sa una sa XL, early `90s pa katong “Kini Ang Akong Problema” with Jay Stevens and Dirty Harry. Even before namo, existing na na siya. Pero dili lang siya ingon ana ka popular kumparar karon. Nawala to ang among tambag-tambag tungod atong “Millennium Bug” phenomenon, nag-totally change format ang XL from masa to high end. Pero wa man mo-klik mao nga balik sa masa.

Dili ba hinay na ang FM radio karon?

Ang iyang market share sa advertising nakuhaan gyud kumparar sa una pero diii siya hinay. Kusog siya sa morning slot pero inig abot sa kilumkilum diha siya mohinay tungod sa mga TV soap opera plus pa sa internet. That’s why Brigada 93.1has come up with music and news for easy access of information and entertainment especially sa mga mobile phone nga way AM station.

Unsay damgo nimong mahitabo sa imong career?

Akong damgo nga makahimo og big event nga maorag festival, ganahan nakong ma-educate ang henerasyon karon nga ang trend sa music nagkausab na, it’s now more on house music, a genre of electronic dance music that originated in Chicago.

Unsa nang house music?

Ang house music repetitive ang iyang rhythm pero puwede ka makaduwa og daghang beat. Mas daghan siya og variation, styles, influence ug sub-genres, sama sa euro house, tech house ug electro house. Mao ni ang bag-ong music nga gusto nakong isangyaw sa atong henerasyon.