P2 MIL SA MGA SENIOR IHATAG OCT. 4-5

MAAYONG balita alang sa 60,000 ka mga senior citizen sa dakbayan sa Sugbo nga taudtaud nang naghuwat sa ilang financial assistance.

Gianunsyo ni Mayor Michael Rama atubangan sa dulan 5,000 ka mga lolo ug lola nga ilang nang madawat ang ikaduhang hugna sa financial assistance karong semanaha atol sa paglusad sa senior citizens month.

Ang mayor nipahibawo nga karong October 4 ug 5, ipanghatag na sa Department of Social Welfare and Services ug City Treasurer’s Office ang tag P2,000 isip dugang sa P4,000 nga ilang nadawat niadtong Abril karong tuiga.

Ang mayor nisaad nga iyang hatagan og tag P10,000 ang matag senior citizen matag tuig pipila ka buwan sa wa pa ang midterm elections.

“The balance (P4,000) will have to be by December. It all depends. It may not be practical (nga) ihatag sa October, hatag sa November. Maybe first week sa December aron gyud they would be able to utilize the amount,” dugang ni Rama.

Ang pahibawo sa mayor gihangop sa pangulo sa Office of Senior Citizens Affairs (OSCA) nga si Rolando Llaguno.

“Ang hataas nga panahon sa pagpaabot sa atong kaigsuonang senior citizens sa siyudad niabot na gayud,” nagkanayon si Llaguno.

Gisigundhan usab sa hepe sa OSCA ang pamahayag ni Rama may labot sa balanse.

“Ang nahabiling P4,000 igahin kadto alang sa Christmas bonus alang sa tanang senior citizens sa dakbayan sa Sugbo,” pasabot niya

Gihulagway ni Rama nga sama gihapon kaniadto ang proseso diin unahon ang mga barangay sa north district ug isunod ang south district.

Manukad ang distribution sa mga barangay hall uban sa mga department head sa City Hall.