Vidal ipaubos og laing CT scan
IPAUBOS og laing CT scan si Cebu Archbishop Emeritus Ricardo Cardinal Vidal aron tan-awon ang kondisyon sa utok niini human na- stroke, duha ka semana na ang nakalabay.
Ang Cardinal magagad sa tambag sa iyang mga doktor kon tugtan ba siya makabiyahe gawas sa nasod human siya nakagawas sa Perpetual Soccour Hospital niadtong Septiyembre 26.
Apan gusto siya mobiyahe sa Roma sa unang tuig sa kasumaran sa pagka santos ni San Pedro Calungsod sud ning buwana aron motabang sa pagbendisyon sa mosayko sa Bisayang santos nga ibutang duol sa mga lubnganan sa mga santo papa.
Matod niya kini maoy labing unang higayon ug dako kining dungog alang sa mga Bisaya labi pa mismo si Pope Francis ang mangu sa blessing.
“It’s a very great honor for us. Because no saint could ever be placed there. Because that is reserved for the popes. It’s the first time,” saysay ni Vidal.
Siya nidugang ang mosayko ni San Lorenzo Ruiz ang gibutang sa altar duol sa Blessed Sacrament diin sagad iselebrar ang mga misa.
Ang retirado nga arsobispo nahinabi sa mga tigbalita kagahapon sa buntag human siya gitugtan sa mga doctor nga makagawas na sa ospital sanglit maayo ang mga resulta sa iyang naunang mga CT scan ug ubang laboratory test.
Ang 82-anyos nga Cardinal niasoy nga gidid-an siya sa mga doctor nga mokaon og mga pagkaon nga tam-is ug daghan og tambok.
Apan siya nipasi-aw nga padayon gihapon siya mokaon og litson baboy labi na kon gikan sa Sugbo. Siya mapasalamaton sa Ginuo nga ni-survive siya sa mild stroke o gitawag og transient ischemic attack.
“Sa awa ng Dios, I’m still alive. I was able to survive,” nagkanayon si Vidal sa pagpakighinabi sa mga media didto sa iyang pinuy-anan sa Sto. Niño Village sa Barangay Banilad, siyudad sa Sugbo.
Nagpasalamat usab siya ug nihalad og espesyal nga misa sa mga tawo nga nag-ampo alang sa iyang daling kaayohan ug nibisita niya sa ospital. Niadtong Septiyembre 17, si Vidal na- stroke hinungdan dali siya gidala sa ospital sa iyang mga kauban sa panimay.