Sikyo nga wanted nasikop

SECURITY guard nga wanted sa kasong pagpanulis gidakop samtang nag-duty sa miaging gabii sa usa ka gasoline station sa may Salvador extension, Barangay Labangon, dakbayan sa Sugbu.

Si Antonio Donan alias Tonton, 26, ulitawo ug taga San Carlos City Negros Occidenta nasikop nila ni Chief Insp. Aileen Recla, hepe sa Investigation and Detective Management Branch (IDMB) ug mga kauban sa Cebu City Police Office.

Si Donan, nasikop pinasikad sa warrant of arrest nga gi-isyu ni Judge Danilo Amisola sa Regional Trial Court didto sa San Carlos City human gitulis nila ang mga pasahero sa Ceres Bus didto sa Bulwangan, San Carlos sa miaging tuig.

Si Chief Insp. Recla, miingon nga tulo ka adlaw nilang gi- surveillance si Donan human nakadawat silag impormasyon nga duna kiniy warrant of arrest sa kasong robbery.

Gisusi niini sa Police Regional Office (PRO-7) dayon mi- coordinate sila ngadto sa San Carlos City Police nga maoy mikompirmar nga wanted ang guwardiya.

Ilang nahibaw-an nga si Donan, ibalhin na unta kinig laing pwesto isip security guard niadtong Lunes apan ilahang gidakop pagka-Domingo sa gabii samtang nag- duty.

Wala mosukol ug malinawon kining mi-uban sa kapulisan.

Si Sr. Insp. Mark Anthony Dorroca, Chief Operation officer sa San Carlos City Police Station, miingon nga gisakiyo nila ni Donan, ang mga cellphone ug iPod sa mga pasahero sa Ceres Bus.

Ang duha niya ka paryente nga sila si Jemuel Calog ug Leomar Dagoldol, nangadakpan ug nabawe ang mga butang, samtang gipangita pa ang laing paryente nga si Jojo Calog.

Giangkon niya ang krimen tungod kay nadala lang siya niadtong higayona sa iyahang mga ig-agaw nga manulis dihang nangahubog sa tuba. Ang korte mibutang og P40 mil pesos nga bail alang sa temporaryo niining kagawasan.