Dili mo-endorso og kandidato: Magpale

MAGPABILIN di moda ang mga opisyal sa Kapitolyo sa umaabot nga eleksiyon sa barangay karong Oktubre 28, sumala ni Bise Gobernador Agnes Magpale.

Apan siya niangkon nga duna siya’y pagbati sa mga kandidato nga magpapili sa nagsingabot nga piniliay.

Iyang giklaro nga dili sila motuboy og mga kandidato alang sa barangay election.

“As much as possible, we’re following the Comelec nga non-partisan. Pero imong pagbati duna jud. I was anticipating ba nga it could happen,” nagkanayon si Magpale.

Ang bise gobernador, Gobernador Hilario Davide III ug mayorya sa mga sakop sa Sangguniang Panlalawigan sa Sugbo ang mga miyembro sa Liberal Party nga gipangulohan ni Presidente Benigno Aquino III.

Si Magpale niangkon usab nga dili malikayan nga dunay mga mokandidato sa nagsingabot nga piniliay nga mogamit sa ilang mga hulagway sa mga tarpaulin ug poster, aron makakuha og mas daghang botos gikan sa mga botante.

Apan iyang gitataw wa sila’y gitugtan sa paghimo niini.

Siya niangkon usab nga duna siya’y mga hulagway uban sa mga incumbent barangay opisyal atol sa pagbisita nila sa iyang buhatan sa Legislative Building sa Kapitolyo o kon imbitahon sila og mga piyesta o kalihukan sa barangay.

“Dili gyud na kalikayan, we might have pictures kanang inviton mi didto sa fiesta unya naay litrato,” dugang pa niya.