Asphalting project sa Talisay wa humana?
MGA molupyo sa Sityo Dapdap ug Sityo Cabutoy sa Barangay Pook, dakbayan sa Talisay padayong nagantos sa grabing kabati sa ilang dalan nga daw sa wa mahatagi og igong pagtagad sa gobiyerno.
Ang maong dapit maoy usa sa mga naigo sa tornado niadtong Hunyo 17 diin pipila ka mga balay ang nangatumba human kini gikusokuso.
Ang dalan maoy lutsanan gikan sa Pook paingon na ngadto sa Barangay Tungkil, lungsod sa Minglanilla.
Apan ang laing gikahibugngan og maayo sa mga tawo sa maong dapit mao ang kalit nga pagundang sa pagespalto sa nahisgutang dalan human kini makasugod og pipila lang ka metros ang gilayon.
“Nalipay na unta mi kay duna na may nagespalto. Abi namo og mamaayo na ang dalan, pero gibiyaan man lang sa contractor. Pait kaayo mi diri labi na og tingulan kay morag lunangan sa kabaw among agianan,” matod pa sa usa ka molupyo nga mihangyo nga di lang sa siya magpaila.
Ang Sun.Star Superbalita misuway sa pagsuhid sa maong agianan.
Pipila lang ka metros gikan sa eskina sa dalan paingon sa Pook, makita ang usa ka billboard nga naghatag og detalye sa maong proyekto.
Kini giulohan og “Asphalting of Tungkil Road, Talisay City, Cebu” ug ang Quirante Construction maoy contractor niini.
Wa man tuoy petsa kon kanusa masugdi ug mahuman ang proyekto apan aduna kini gahin nga P617,500 nga kuwarta sigon sa nahimutang sa billboard.
Nabutang usab nga ang DPWHCebu 2nd D.E.O. maoy implementing office. Blanko ang source of fund sa maong proyekto ug sa ubos nga bahin nakabutang ang logo ug ang Department of Public Works and Highways.
Adunay numero sa telepono kon kinsay angay kontakon kon ug galing adunay reklamo kalabot sa maong proyekto.
Apan naobserbahan nga gawas nga wa mabutang ang tinubdan sa pundo ug pitsa niini, ang numero sa telepono numero pa gyud didto sa Kaulohan.
Dunay mga huhungihong nga posibling ang proyekto iya pa sa niaging administrasyon.
“Mubo ra gyud kaayo ang naespalto unya ang budget kapin sa tunga sa milyon,” dugang saysay sa usa sa molupyo sa maong dapit.