Aparis mitaliwan
ORMOC CITY - Mitaliwan sa laing kalibutan ang kanhi bise mayor ug kanhi first councilor ning dakbayan nga si Atty. Nepumoceno Aparis niadtong milabayng adlaw didto sa Chong Hua Hospital sa Sugbo.
Si Aparis, nag-edad og 63, nitaliwan nunot sa sakit sa atay nga taudtaod na niyang gihambin.
Niadtong milabayng buwan, gisud sa Intensive Critical Unit sa OSPA-FMC ning dakbayan si Aparis ug nagpailin kini sud sa pipila ka adlaw didto sa ilang balay.
Gani, medyo naulian ang opisyal apan dakong kakurat sa mga suod niini nga gidala kini sa Sugbo mga alas 2:15 sa hapon niadtong Lunes, diin 14 ka adlaw sa una pa kini magsaulog sa wedding anniversary, nakabsan kini sa kinabuhi.
Wa pa makuhai og opisyal nga pamahayag ang pamilya ni Aparis human sa pagtaliwan niini.
Naka-half mast ang bandera sa Pilipinas nga nahimutang sa mga opisina nga ubos sa lokal nga kagamhanan ning dakbayan isip simbolo sa pagbangutan sa mitaliwang opisyal.
Ang mga kawani sa lokal nga kagamhanan miingon nga sakit alang kanila ang pagkawala sa usa ka tinahod nga opisyal.
Gani, ang staff niini nga si Caroline Fredo wa masayod nga dunay gihambin nga balatian ang opisyal tungod kay gipakita man niini ang iyang pagkabaskog.
Si Bise Mayor Leo Carmelo Locsin Jr., presiding officer sa 13th Sangguniang Panglungsod, niingon nga dako kaayong kakuwang sa konseho ang pagtaliwan sa opisyal kinsa maoy minority floor leader.
“It’s a big loss to the council and not only sa council kon di sa tibuok Ormoc kay bisan og lahi mi og partido niya pero never gyod nahitabo nga nag-argue mi sa konseho, usa siya ka maayong taw, respetado ug beterano gyod,” matod sa bise mayor.
Nagdumili si Locsin pagtubag kon kinsa ang mohulip sa nabakanteng posisyon ni Aparis.
“Di lang sa ko mohatag og comment karon bahin anang kinsay puli, ang importante magampo ta karon sa iyang pagkawala,” midugang si Locsin.
Sa iyang bahin, si kanhi Mayor Eric Codilla diin si Aparis nahimo niyang bise mayor miingon nga bisan sa ka beterano ni Aparis nag-agad gihapon kini sa iyang mga kaubanan sa konseho ug usa kini sa iyang gisaligan.
Kagahapon, si Charlene Aparis, pag umangkon sa nitaliwang opisyal, miklaro sa kon kanus-a dad-on pagbalik dinhi sa dakbayan ang patayng lawas sa opisyal.
“Ang giingon karong hapon (Martes) dad-on og balik sa Ormoc,” matod ni Charlene.
Si Aparis nagsugod sa iyang karera sa politika niadtong 1987 ug hangtod ning tuiga diin siya ang first councilor human midaog sa boto nga 37,332 niadtong milabayng piniliay.