Lalake nga nanilhig sa ilang balay, gipusil

Biktima nakalingkawas sa kamatayon

DUMAGUETE CITY - Human sa sunodsunod nga pagpamusil sa dakbayan sa Tanjay, karong bago laing nabiktima sa pagpamusil nga nahitabo niadtong milabayng gabii.

Giila ang biktima nga si Larry Sambilay, 52, minyo ug mulupyo sa Barangay Polo sa nahisgutang dakbayan.

Samtang, ang suspek natumbok nga usa ka lalake ug nag-angkas kini sa usa ka motorsiklo.

Gikataho sa kapulisan nga si Sambilay nanilhig sa mga laya nga dahon atubangan sa ilang balay ug nibalhin sa mga sako nga dunay sud nga bas gawas sa ilang balay sa National Highway, Barangay Polo dihang kalit lang may usa ka motorsiklo ang milabay sa ilang balay ug nihunong pipila ka metros sa gipuy-an niini.

Ang nag-angkas sa motorsiklo nanaog ug miduol sa biktima dayon pusil niini sa makadaghang higayon.

Nakaangkon og daghang samad pinusilan sa tiyan ug ubang parte sa kalawasan ang suspek.

Human sa insidente, daling nibiya ang suspek luwan sa giangkasan niyang motorsiklo ug nipahilayo paingon sa habagatang bahin nga direksyon.

Samtang, ang biktima nakahigayon kini sa pag-adtos a ilang balay ug nangayog tabang.

Ang pamilya sa biktima daling nitaho sa buhatan sa kapulisan sa Tanjay ug usa ka team sa Tanjay PNP ang daling miresponde sa lugar nga pinanguluhan ni SPO4 Gaspar Torres.

Sa pag-abot sa kapulisan sa balay sa biktima, gikarga na kini sa sa ambulansiya ug gidala sa Silliman University Medical Center (SUMC) ug gioperahan.

Nakuha sa kapulisan gikan sa lugar ang walo ka mga basiyo sa bala sa kalibre .45 nga armas.

Sa pagkakaron dugang imbestigasyon ang gihimo sa kapulisan aron pagsuta sa motibo sa pagpamusil ug pagdako sa mga suspeko.