Ambassador Boots Bandillo
MITAGHOY ang kapalaran. Abi kog usa lang ka yanong tingog gikan sa usa ka midayeg kaniya. Apan komentaryo ni Unang Ginang Imelda Marcos kang Boots, “He is a boy genius! “
Atol kadto sa iyang pagdawat sa usa ka nasudnong pasidungog nga gihatag sa English magazine nga Focus Philippines sa poetry (pamalak) didto sa Maharlika Hall, Malacanang Palace. Mismo si Pamuno Marcos ang mitunol. Ang tukmang panahon: January 25, 1975. Buhing saksi ko sa gisulti sa Unang Ginang. Mitagingting sa tinawng mga letra sa akong dunggan kadtong iyang gipamulong. Kay, puyra buyag, napiksan ko sa suwerte, sama kang Boots nidawat sad sa maong pasidungog uban kang Eyon Auman (PSK), ang laing Sugbuanong magbabalak.
Tulo kami nga tagaSugbo nga gipasidunggan sa English poetry, ang laing pito gikan sa nagkalainlaing dapit sa kapupudan. Diha poy gipasidunggan sa short story ug essay.
Apan minor de edad si Boots, 17 anyos lang tandi namo. Ako niadto 30 samtang si Eyon 37. Tuod, wa pay igong buot si Boots, apan nagpakita sa pagka henyo sa panuwat nga nakapugwat kang Imelda.
Dinhi misugod sa paglabyog ang tugot sa iyang kinabuhi sa kalibutan uban kanamong mga magsusulat sa Sugbo. Dihay iyang dikidiki sa pagsuwat sa atong pinulongan. Nakasabot mi tungod sa iyang dakong hiligsa pinulongan ni Francis Bacon.
Hinuon, nabihag mi sa iyang kamatinudanon sa iyang pagkatawo. Sa iyang damgo nga magtukod og lahi nga kalibutan sa among parnaso. May misteryo ang iyang mga panlantaw,
Nakigdukot siya kanamo bisan sa gilayon sa panuigon tungod lamang sa gugma sa panuwat ug sa iyang nakita nga sama niya nakasabot mi sa among tumong sa pagpakabuhi. Ordinaryo ming tawo nga naglantaw sa mga bituon sa among mga balak.
Nakita namo ang iyang kapuslanan sa Bathalad. Sa usa ka pamilok, kinsa bay magdahom? Gituboy ug gipili siya nga ikaduhang pamuno sa Bathalad (1990) nga ning tungora ang pundok nanubo pa ang mga palwis aron makalupad.
Duha ka mga mapuslanong tuig ang iyang pagpanimunil sa pundok. Natilawan sa unang higayon sa mga sakop ang pandayan sa panulat (writing workshop) nga gisabak sa Cultural Center of the Philippines (CCP).
Unya, wa dahuma namong tanan ang pagbalingis sa iyang mga tiil ngadto sa usa ka matahom nga dalan. Sa 1992 Foreign Service Career Exam., siya ra ang nakapasar sa Visayas region. Kawani siya niadto sa Phil. Information Agency(PIA) gikan sa academe,
Dinhi milupad ang bagong tugot sa iyang kinabuhi. Nahimong vice consul sa Hamburg, Germany. Gitudlong consul sa Dubai, consul general sa Palau, dayon chief of mission. Karon, ambassador na ang “boy genius” nga si Boots naassign sa Bangladesh.