Kisaw sa barangay

NAGBUKAL na ang kawa sa pulitika sa barangay nunot sa nagsingabot nga eleksyon sa barangay karong Oktubre 28. Sa Oktubre 18 ngadto sa 26 pa ang campaign period apan grabe na ang kisaw sa kalihokan sa mga kandidato sa ilang pangampanya.

Namatikdan nga mas grabe ang kainit sa pulitika sa barangay kon itande sa ubang eleksyong lokal ug nasyonal. Mas direkta nga naapektohan sa dinautay sa away sa pulitika ang relasyon sa pamilya ug managsilingan busa, mas emosyonal ug lawom ang samad sa pagbati.

Ang barangay nga nakalatid sa balaod nga nonpartisan, apan sama sa naadan, ang grupo sa mga kandidadto maila nga nalinya sa usa ka partido sa pulitika ug dayag ang pagdapig usab sa mga pulitika nga naa sa taas nga posisyon.

Maayo na lang nga naoktaba ang piniliay sa Sangguniang Kabataan (SK), nga gibansay unta nga mosunod nga lider apan gitudloan na hinuon sa dunot nga sistema sa karaang pamulitika sama sa pagpamalit og boto ug pagtago kanila.

Ang eleksyon sa barangay importante aron pagpili sa tukmang lider nga magpahan-ay sa maayong pundasyon sa labing ubos nga gambalay sa organisasyon sa kagamhanan o nasod.

Busa, atong hagiton ang tanang nanagan alang sa posisyon sa barangay nga motutok sa ilang platapormal sa pagdumala sa barangay kon modaog.

Atong awhagon usab ang lumolupyo sa barangay nga dili mapadala sa grabeng kisaw sa pulitika ug ipatigbabaw ang kalinaw ug maayong relasyon sa pamilya ug managsilingan.