Press Freedom, Broadcaster’s Month
NIADTONG Sabado, Septiyembre 28, hingpit nga gitapos ang pagsaulog sa Brodkasters Month pinaagi sa usa ka salosalo nga gitambungan sa mga magsisibya sa radyo ug telebisyon nga gipahigayon sa Capitol Social Hall.
Apan mas unang misira ang usa ka semana nga Press Freedom Week nga napuno sab sa mga dagkong kalihukan apil na ang duwa sa basketball nga maoy bati nako nga kasinatian apan alegre ug malampuson.
Naigo man gud ang akong mata sa siko sa usa sa mga player sa PNP beat reporter nga hangtod karon pabilin pang milagom ug nabun-og ang wala nako nga bukton sa akong pagduwa sa team judiciary nga kauban ang reporters.
Kampiyon ang PNP beat reporters tungod sa ilang teamwork di sama sa among team nga duha ra ka player magpasahay sila si Sanico ug Balbuena sa TV 5. Ang basketball team effort ug dili padak-anay sa puntos. Ato ni silang patudloan ni Sir Bobby Inoferio og basic sa basketball kay duol na ra ba ang NBAC.
TENNIS
Nagplano ko karon sa pagsuway sa pagduwa lang una og tennis kay duna naman koy injury. Ilang tambag sa tennis lang una samtang wala pa maayo ang akong knee injury ug hamstring mga usa na ka tuig tungod sa pagduwag badminton ug basketbol.
Ang akong gihimo misuway ko ug tan-aw sa tournament sa Baseline. Di man gyud tuod kapoy sa akong nakita sa mga lower level kay ang ilang bola sigeg lubo morag nagduwag volleyball. Dili sab sakit sa tuhod kay ang sapatos mo- slide man lang sa korte.
Nasud sa akong hunahuna nga di lisud kay duna naman koy maayong stroke sa badminton ug miagi kog proper training. Gani nakaduwa na nako ang lainlaing mga varsity ug ning tuiga akoy champion sa single sa 35 and above sa Metro Sports nga giduma ni Gabriel Suico, coach sa University of San Carlos.
Aron makat-on, nagsige kog tan-aw sa tournament hangtod na sa finals. Tayming sab nga ang akong suod nga amigo ug barkada nga si Rankol Guillemer dihang sa Mandaue pa ako nagpuyo niadtong 1980s, pambato man diay sa tournament sa level A.
Kaniadto kun magduwa sila og tennis duol sa among gipuy-an igo rako sa pagtan-aw kay di man ko interesado. Kun magduwa sab me ug basketbol sa inter barangay sa Mandaue kuyog sab siya namo kauban ni coach Jerry Aratan sa Team Brgy. Cambaro.
Pila may estorya sila si Rankol kauban ni Doc. Rudolfo Curay, kanhi varsity player sa tennis sa Ateneo ang nahimong kampyon. Sayon ra nilang gikulata ang inilog ug mga batan-ong Yak brother sa score nga 8-4.
Ang tennis sama sa basketbol ug badminton dili pakusganay, kinahanglang gamit gyud ang utok ug teamwork. Pagbutang sa bola, tayming sa pag-atake ug ekontrol ang error sama sa duwa nila ni Curay ug Rankol nga kamao sa tanan.
Sa umaabot nga mga adlaw mosud na gyud ko ug korte sa tennis aron hingpit nga mahibaw-aw diba makabun-og sa tuhod. Pero ang badminton mao gyoy pinakanindot nga duwa sa tanang mga sports nga akong giduwaan apan maoy duol sa injury.