Gahi ug ang humok nga pork
DUNA diay hard project ug soft project sa pork barrel sa atong mga magbabalaod.
Kabahin sa hard project mao ang karsada, taytayan ug mga tunghaan. Ang soft project pananglitan mao ang pagpalit ug tambal o pagkaon alang kuno sa mga kabos.
Kon pangahasan nato ug binisaya, mahimong ang hard project atong tawgon ug gahi ug ang soft project mao ang lumoy o humok nga proyekto.
Nunot sa kontrobersiya sa pork barrel, may sugyot nga ang tangtangon mao lang ang gahi ug ipabilin ang humok o lumoy nga proyekto. Luoy kuno ang mga kabos nga maangin sa kontrobersiya kon apilon sa pagtangtang ang mga lumoy nga proyekto.
Apan gahi man o lumoy nga proyekto, dili makaeskapo sa korapsyon sa pork barrel kon tuyuon sa pipila ka mga magbabalaod.
Dinhi bitaw sa Sugbo, ang gahi mao nang sobra sa P600,000 nga kantidad sa tangkal sa kanding diha sa Barangay Taptap. Kana ang gahi. Apan ang humok mao ang kanding nga wala nabotang sa tangkal ug mas dako nga kantidad nga P7.6 milyunes ang balor ug dili maklaro ang esplikasyon ug hain na kini.
Bubentaha pa gani ang gahi nga proyekto kay naa pa tay makit-an. Mas sayon ug humok kurakuton ang humok o lumoy nga pork barrel kay igo lang tang pakitaon ug minug-mugna nga resibo.
Kabahin sa privilege speech ni Senador Jingoy Estrada mao ang nagasto ni Mandaluyong Congressman Neptali Gonzales nga P6.6 milyones sa pagpalit ug hamburger sa usa ka food chain.
Gisumada ni Jingoy nga kon tag P40 ang matag hamburger, sa P6.6 milyones nga pork barrel ni Gonzales, nakapalit siya og sobra sa 200,000 ka mga hamburger. Tubag ni Gonzales nga tinuod nga siya nagpakaon ug hamburger sa iyang mga konstituwente atol sa iyang birthday. “Langhap na langhap ang sarap,” matud ni Jingoy. Lami alang sa mga magbabalaod ang mowaldas sa pork barrel nga gipatud-an ug singot sa mga magbubuhis Nakamenus na sila ug maayo sa mga magbubuhis nga mao untay mituboy nila sa puwesto.
Sa miaging Domingo, mas midaghan na ang mga tawo sa Sugbo ang misalmot sa rally batok sa pork barrel. Nagpasabot lang nga mas nagkadaghan na sa katawhan ang nakasabot sa nagkagrabeng kangil-ad nga sistema sa korapsyon ginamit ang pork barrel.
Ang katawhan miabli na sa ilang ba-ba aron ikondenar ang gihimo sa mga kawatan nga mga magbabalaod nga labaw pas mangtas nga miunay ug suyop sa dugo sa ilang mga igsuong Pilipino.
Nahisama sa mga gagmayng hulmigas ang katawhan nga hinay-hinay nang nanggawas sa ilang kabalayan ug nagmartsa sa karsada aron ipakita ang dakong puwersa batok sa korapsyon.
Si kanhi Presidente Corazon Aquino mimartsa kaniadto sa kadalanan ug nagmalampuson sa pagbawi sa demokrasya gikan sa diktadorya tungod sa nagkanayon nga suporta gikan sa katawhan.