Ang protektor

NAKAMATA si Greg sa kusog nga pagyugyog sa iyang abaga. Nagpanglugod siya sa iyang mga mata sa iyang tudlo dihang mibangon siya.

“Ngano ba, Saling? Kanindot sa akong tulog namukaw ka man? Unsa na bang orasa?” nagsipok ang ulo ni Greg nga mitan-aw sa iyang asawa nga diha sa iyang atubangan.

“Alas singko na sa buntag, uy. Wa pa mahiuli ang atong anak,” puno sa kabalaka ang tingog ni Saling.

“Unsa?” nahasinta ang tingog ni Greg. “Karon pa ni mahitabo, Saling?” “Mao lagi.” “Wa nimo siya tawgi sa selpon?” “Di motubag. Sige lang kiring iyang selpon. Sus, Greg, pangitaa intawon siya kay basig unsa nay nahitabo kang Cris.” Naghilak na si Saling.

Wa pa gani makatubag si Greg, mitingog iyang selpon.

“Nia sa presinto imong anak. Nadakpan namo sa akto nga nagsuyop og shabu.”

Wa na tubaga ni Greg ang nagtawag. Nagdali-dali siya paghilam-os ug unya nag-ilis. Gisultihan niya si Saling sa nahitabo sa ilang anak. Mingaab si Saling.

“Nagbisyo na diay si Cris sa shabu, Greg? Nganong wa man madakpi ang mga pusher sa shabu dinhi sa atong dapit, uy?”

Wa na magtingog si Greg. Nagdali siyang migawas sa ilang balay. Usa ka tinugyanan sa balaod si Greg sa ilang lungsod sa Santa Catalina. Gusto niyang tabangan ang anak. Kauban niyang mga pulis ang nakadakop kang Cris. Apan pag-abot niya sa presinto, ang ilang hepe maoy nangusog nga angay gyud nga bilangguon ug pasakaan og kaso si Cris. Adunay mga ebidensiya nga nakuha.

“Bisag imo siyang anak, Greg. Pero way gipinig ang balaod. Angay siyang silutan sa iyang gibuhat.”

Sa tan-aw ni Greg, wa na gyud siyay mahimo. Lig-on ang mga ebidensiya batok kang Cris. Pulos klasmet sa hayiskol sa ilang lungsod ang kauban ni Cris nga nagsuyop og shabu.

“Angay dakpon ang protektor sa ilegal nga drugas dinhi sa atong lugar, Greg. Daghan pa unya ang mga batan-on nga magumon ani. Luoy kaayo sila. Way maayong kaugmaon nga ilang makuha aning shabu.” Naghilak si Saling dihang mipauli na si Greg aron pagsugilon nga wa siyay nahimo sa pagluwas sa ilang anak gikan sa bilanggoan.

Lawom ang panghupaw ni Greg. Bugtong nilang anak si Cris. Wa gyud siya magdahom nga mabiktima kini sa gidiling druga. Gusto niyang basulon ang iyang kaugalingon.

USA ka buntag sayo, nahigmata si Greg tungod sa pag-abot sa ilang hepe ug duha ka kauban niyang pulis sa ilang balay.

“Duna mi dalang warrant of arrest para nimo, Greg. Gidakop ka namo tungod kay ikaw ang protektor sa mga drug pusher dinhi sa atong lungsod,” matod sa ilang hepe.

Huyhoy ang mga abaga ni Greg dihang gipusasan na siya. Ug sa wala pa siya dad-a sa nagdakop kaniya, mitan-aw siya sa iyang asawa. Nakita niya ang kalig-on sa iyang asawa. Hait ang tinan-awan niini kaniya.

Nasayod si Greg kon kinsa ang nagsumbong sa ilang hepe bahin kaniya, nga siya ang protektor sa mga drug pusher sa ilang dapit. Miduko siya. Wa siya makaharong sa tinanawan sa iyang asawa kaniya.