Sama sa punoan

Dear Papa Joe,

Tawga lang ko og Maria, 34, nagpuyo sa habagatang bahin sa Cebu. May 3 ko ka anak. Mag high school na apan wa koy bana, kapuyo ra sa una apan gibiyaan mi kay minyo man diay.

Nagtrabaho ko sa una sa Dubai ug nahimamat nako ang usa ka lalaki nga nahimo nako nga hinigugma. Nihangyo siya na manguli mi sa Pilipinas ug mag-ipon sa kay wa pa man miy kwarta ikagasto. Nadawat man niya akong mga anak apan wala ni motipon namo kay nagtungha pa man ni sila sa amo. Mao to nga nangabang sa mi og apartment diri sa Cebu City. Nakasabot ko nga muna-muna sa akong pares nga maninguha. Nisaad man sad siya nga tabangan akong mga anak sa ilang pagtungha sa college.

Karon ang nahitabo, after sa tulo ka tuig namong puyo, namabdos ko ron sa duha na ka buwan akong tiyan ug naguol ko kay basin mapasagdan ang akong mga anak kay wala koy trabaho na kay magliponglipong na man ko. Nisamot ko nga nasakitan sa akong kapuyo dihang ako siyang giingnan nga paari-on nako ang akong mga anak unyag sembreak apan iya kong giingnan na kami na lang daw ang moadto mobisita sa amo kay kuwang siya sa budget. Nagtigom siya apan wa siya masayod sa dagan sa akong pagmabdos apan nasakitan ko kay feeling nako di siya ganahan nga dad-on nako ang mga bata diri. Hangtod nga naka- decide ko nga biyaan nalang nako siya ug mangayo lang ko og tabang sa amahan sa mga anak nako sa una kay maorag wala may future akong mga anak niya. Unsa may buhaton nako?

MARIA Maria,

Basin dala lang na sa pagmabdos nimo imong pagbati. Lapadlapari imong pagsabot ug di ka magpadala sa emotion nga basin diktar sa imong pagsabak. Basin magmahay ka. Dili maayo nga makigkita ka ug mangayo og tabang sa kanhi nimo niining sitwasyuna. Basin matintal ka ug mapun-an ug dugangan ang bata (joke). Bitaw delikadeza ba.

Bati siya sa imong panan-aw karon ang imong boyfriend apan paminawa ang iyang punto. Kon naa man siyay rason, ievaluate ug ayaw dayon og conclude. Ayaw sab isalig niya ang future sa imong anak kay what if tunga-tunga sa inyong relasyon, mamatay siya. Mamatay sad ang kaugmaon sa imong mga anak?

Way punu-an sa kahoy nga daan. Nagugod gyud na sa gamay nga tanom. Dili tanang punu-an sa kahoy makahatag og landong. Ang uban kay sagbot pa ang ihatag. Busa ihangad tanan sa Ginuo kay siya ang tubag sa tanan. Daghang salamat.

PAPA JOE