Time to love again

IGO nag mitingsi si Liandro nako. Nagpacute siyag tinan-awanan nako. Gibilikis ko ang akong bukton sa hawak sa akong boyfriend. Iya kong giagbayan.

“Ihatod na ko sa boarding house, Lian.” “Sige. Hapit na sab mogabii.” Bisag di gyud matawag nga layo ang gipuy-an namo ni Liandro sa Carmen gikan sa siyudad wa mi magpaulian kada gabii. Nagsaka mig boarding house si Liandro. Sa Jakosalem ang boarding house nga akong gipuy-an, samtang si Liandro sa Sanciangko nag-ahang og boarding house.

Mao sab si Connie ug Arwin, nag-abang sila og boarding house dinhi sa siyudad. Parehas sila namo ni Liandro, kada Sabado sa hapon ra mopauli sa Carmen. Mao ni ilang gisulti sa dihang nagbuwag na mi ganina sa Colon.

Wa dayon ko makatulog nianang gabhiona. Mingaw na ang gihigdaan kong kuwarto, naghagok na ang tulo ko kaubang boarders sa kuwarto. Doubledeck ang among higdaanan, ingon man gyud ani ang higdaanan sa mga boarding house.

Misamot kaguwapo si Arwin. Naa gihapon niya ang kinaiya nga pagkamadasigon ug pagka malipayon. Ug si Conney, well, guwapa sab. Nahunahuna ko karon ang among kasuod ni Arwin sa pagtungha namo sa hayskol. Mao sab ang kasuod ni Conney ug Liandro. Nuon, si Liandro ug Arwin mao gyuy labing close friend, ug kami sab si Conney ang suod sab kayo. Pero kaming upat ang barkada sa eskuwelahan.

Ug karon nga college na mi, si Arwin ug Conney ang nagkatrato, ug kami sab si Liandro ang nagkahinigugmaay.

Kalit nga mitingog ang call alert sa akong selpon. Dali kong gisusi kon kinsa ang nagtawag. Sus, si Conney. Wa pa sab diay matulog ang akong close friend.

“Parehas diay ta, Con, nagmata gihapon bisan lawom nang gabii.” “Bitaw, uy, Donita. Wa man ko makatulog.” “Duna tingali kay gihunahuna maong wa makatulog.” Mitarong kog higda.

“Ikaw, duna say gihunahuna, no, mao nagmata gihapon ron?”

“Aw, kamo si Arwin ang akong gihunahuna, uy. Morag malipayon mo sa inyong relasyon, da.”

“Ay, oo, uy. Pero ato ra ni, ha. Gilimbongan ko gihapon ang akong kaugalingon. Wa man gyud ko makat-on sa pagmahal kang Arwin, uy.”

Nahilom ko sa confession ni Conney.