Hingigong pulis ray pahatagan sa allowance; Mike supak

GIDUSO ni Konsehal Richard Osmeña, chairman sa committee on peace and order sa konseho, ang gun proficiency test ngadto sa mga sakop sa Cebu City Police Office bugti sa pagdawat sa matag pulis sa tag P4,000 nga monthly allowance.

Kini ang gibutyag ni Engr. Eugene Elizalde, presiding officer sa Police Coordinating and Advisory Council, atol sa ilang weekly meeting kagahapon aron mahanas ug mahimong sharp shooter ang mga pulis.

“It was suggested by Councilor Osmeña. During the time of his father, si Vice Mayor Renato Osmeña, based on performance and proficiency man gyud ang allowances. So that moserious ang police sa iyang pagda sa iyang firearm. He can use it properly, dili lang pang display sa kilid,” pasabot ni Elizalde.

Apan ang rekomendasyon ni Osmeña gibaraw ni Mayor Michael Rama, kinsa dakong supak sa vigilante style killing nga nahitabo sa siyudad pipila ka tuig ang nakalabay.

Pipila sa mga mamuno gidudahan ug gikareport nga gikan sa hutong sa kapulisan.

“Wrong sad na. Kana ra bang mga (pulis) nga hingigo, ngita gyud nag igon. Unya kanang ubang hingigo, dili man na macontented og tiiltiil lang, pangitaon ana ulo. Unsang kalakiha na. Di pud ko sugot ana,” nagkanayon si Rama.

Si Rama niingon nga mas mahinungdanon alang kaniya ang kalantip sa pangisip sa usa ka pulis.

“Kinahanglan nako utok, dili kinahanglan gamiton ang pusil. Kanang pusil katapusan ra na. Kon moabot man gani nga mamusil, dili sad ingon nga mataya ilang pusil,” dugang sa mayor.

Siya nagkanayon nga managlahi ang allowance, incentive, remuneration ug compensation ug di angay ibugti ang allowance sa mga pulis ngadto sa ilang abilidad sa paggamit sa armas.

Ang presiding officer sa PCAC nagkanayon kon ipatuman ang maong proposal, wa nay butalo nga pulis uban sa plano nga pagpadagan og bullet reloader sa CCPO alang sa ilang pagbansaybansay.