Rain or Shine mobawos sa Petron

Duwa karon 7:15 pm- Rain or Shine batok Petron

BISA’G wala ang sinaligan nilang pointguard nga si Paul Lee, misaad ang Rain or Shine Elasto Painters nga makabawos sa Petron Blaze Boosters karong gabii sa Game 2 sa ilang best-of-five semifinals series sa Philippine Basketball Association (PBA) Governor’s Cup sa Cuneta Astrodome sa Pasay City.

Ang Blaze Boosters nakaeskapo og 91-83 nga kadaugan sa premirong duwa sa siries niadtong Lunes aron inaton ang ilang sunodsunod nga kadaugan ngadto sa 10 lakip na sa elimination round ug quarter-finals.

Ning maong duwa, nagbangis og maayo ang import sa Blaze Boosters nga si Elijah Millsap ug nagpakatap kini og 41 puntos lakip na niini ang krusyal nga 11 ka sunodsunod sa 4th quarter.

“Elijah Millsap bailed us out in the opening game of the series. But we gotta get contributions from our locals. Some of our local players must step up in the second game on Wednesday,” asoy ni Petron head coach Gee Abanilla.

Ning higayuna, naglaom si Abanilla nga makadawat gihapon og saktong suporta gikan sa Sugbuanong higante nga si Junemar Fajardo, kinsa miamot og 15 puntos ug 17 rebounds.

Mipasalig ang produkto sa University of Cebu (UC) Webmasters nga tutokan niya’g insakto ang duwa ug dili siya magpadala sa grabe ka pisikal nga kombati.

Sa Game 1, grabeng binanggaay ang nasinati sa 6’10” nga magduduwa batok sa mga dagko sa Elasto Painters.