Lagtang cagers nakaseguro na sa finals

NAKASIGURO na og luna sa finals ang Lagtang five human kini makaiskapo sa pagpanghudlat sa San Isidro cagers, 96-90, sa ilang cross-over semifinals round niadtong Lunes sa gabii sa 1st Talisay City Mayor JVR’s Cup Inter- barangay tournament Open division sa Talisay City Sports Complex.

Ilang ikasangka sa finals ang modaog sa laing semifinal game tali sa Tabunok ug Poblacion nga giduwa pa kagabii samtang ang mapildi maoy mosakbang sa San Isidro.

Kontrolado gyud unta sa Lagtang ang duwa gikan sa sinugdanan apan ang 10-2 nga rally sa San Isidro nga giduslitan sa duha ka triples nila ni Gonzaga ug Gutana maoy naghudlat sa Lagtang.

Hinuon pinaagi sa liderato sa beteranong pointguard nga si Celso Colegado, nakuha og balik sa Lagtang ang momentum ug didto gisiguro pagselyo ang kadaugan.

Sa SK divison, way kukaluoy usab nga gilubong og taga liog sa Lagtang ang Pook, 90-55, sa ilang semifinals round.

Ang Lagtang maoy nakakuha og katungod sa pagpakigsangka sa una nang nasulod sa finals nga Cansojong alang sa championship.

Ang Pook ug San Roque maoy mag-ilog sa third place. Ang mga puntos: Lagtang (96) – Alferez 24, Aldave 17, Dela Pena 14, Sacares 14, Colegado 10, Tabar 8, La Pena 5, Ocanada 4.

San Isidro (90) – Gutana 23, Gonzaga 18, Rios 16, Cabanero 11, Kong 9, Bardillas 8, Garces 2, Yap 2.