Resulta sa Cesafi finals

SUKWAHI sa nag-unang tulo ka mga duwa, unang nakaratsada ang opensa sa University of the Visayas (UV) Green Lancers sa pagpangulo ni John Abad aron usban pagpukan ang defending champions Southwestern University (SWU) Cobras, 71-66, kagahapon sa Game 4 sa Cebu Schools Athletic Foundation Inc. (Cesafi) college division finals series sa Cebu Coliseum.

Ang kadaugan maoy nakapugos og deciding Game 5 nga ipahigayon ugma sugod sa alas 4:00 sa hapon.

Si Abad, kinsa maoy labing gamay sulod sa korte, mipas-an sa tahas sa usa ka higante ug iya kining nabarugan pinaagi sa pagpupo og 24 puntos aron pangulohan ang kadaugan sa 9-time champions Green Lancers.

“Ako lang gyud gisultihan ang akong players nga humble lang ta sa duwa. Basta kining duwa namo sa series among gi- offer sa Ginuo,” matod ni Green Lancers coach Felix Belano.

Pagsugod pa lang sa duwa nagbangis na si Abad ug nakamugna na kini’g 15 puntos sa human sa 1st half aron hatagan ang Green Lancers og 43-29 nga labaw.

Sa pagsuporta nila ni Wowie Escosio, import Mike Nzeusseu, ug Francisco Arong, nagpadayon ang kainit sa Green Lancers hangtod nga nainat nila ang ilang labaw ngadto sa 49-31 sa 3rd quarter, labing dako nilang nahimo.

Sa paggiya nila ni Mark Jayvenn Tallo, import Landry Sanjo, ug Daryl Goloran, ang Cobras ni coach Raul “Yayoy” Alcoseba inanayng ningkamang hangtod nga nakasikit sila pagbalik, 66-69, sa nahabiling 50 segundos.

Human sa pipila ka pulipuli og gunit sa posisyon sa bola, sa wala damha nakamugna og turnover si Tallo gikan sa inbound play sa nahabiling 18 segundos nga tatawng ningkumot sa ilang poruhan.

Mitiglom og samot ang poruhan sa Cobras human napasulod ni Abad ang iyang duha ka freethrows nga naghatag sa Green Lancers og 7166 nga labaw sa himatyong segundos.

Human niini, gidawat na sa Cobras ang ilang kapildihan. Puntos matag usa UV (71)- Abad 24, Escosio 14, Arong 11, Nzeusseu 8, Codilla 5, Perolino 4, Santillan 3, Akomo 2

SWU (66)- Tallo 28, Sanjo 17, Goloran 12, Arong 7, Mohammed 2.