3 KA BATAN-ON GIPAMUSIL, PATAY

TULO ka mga batang-ong lalaki ang biktima sa pagpamusil-patay sa managlahing dapit sa lalawigan sa Sugbo.

Duha gipauwanan og mga bala samtang nahinanok sa pagkatulog sulod sa usa ka payag kagahapon sa alas 2:30 sa kaadlawon sa Purok 1, Barangay, Daanglungsud, dakbayan sa Toledo.

Ang managsilingang biktima mao sila si Mark Joaquin Dalisay, 19, ulitawo, namatay dihadiha ug taga Purok 2 sa maong dapit ug Jeffrey Omandac 21, ulitawo namatay sa tambalanan sa Toledo.

Si PO2 Joey Alquiza, desk officer sa Toledo Police nga nahinabi sa dySS Super Radyo ug Sun.Star

Superbalita, nagkanayon nga ang mga biktima nangatulog sa payag sulod sa luna nga gipanagiya sa usa Rosalinda Gabucan.

Nakugang nalang ang mga silingan dihang nakamata sila kagahapon sa kaadlawon nga daghang sunodsunod nga buto sa armas sa may payag.

Sa pagsusi nila, ang mga biktima nga nangatulog nabulit na sa dugo diha sa kalawasan, si Dalisay, patay dihadiha ug si Omandac, buhi pa hinungdan nga gitabang gidala sa tambalanan pero nakabsan lang gihapon sa kinabuhi.

Ang kapulisan nakarekuber sa crime scene sa 11 ka kabhang sa bala sa .9mm pistol ingon man pito ka mga slug niini.

Si Chief Insp. Michael Anthony Bastes, hepe sa Toledo Police, nagkanayon nga gitan-aw karon nila ang daghang anggulo sa krimen.

Usa niini ang illegal nga drugas ug susihon sab nila ang gipahibalo sa ginikanan ni Dalisay, nga usa ka bulan na nga wala mopauli sa ilang panimalay nagsige nalang tagotago.

Gipasabot ni Bastes, dunay bug-at nga rason kun nganong wala mopauli sa ilang pinuyanan si Dalisay hinungdan nga mahibaw-an kini nila sa dugang pagpanguhag impormasyon sa pagkatawo niini.

Samtang, usa ka lalaki nga nahinanok sa pagkatulog gipauwanag bala ug namatay kagahapon sa alas 12:50 sa kaadlawon sa dalan F. Ralota, Barangay Poblacion, dakbayan sa Danao.

Si Ariel Peter Rom, 31, ulitawo taga Barangay Tuburan Sur, deadonsa tambalanan sa Danao, human nakaangkog samad pinusilan sa iyahang ulo ug bukobuko.

Si SPO4 Aresteo Espina, desk officer sa Danao Police, nagkanayon nga ang walay nakaila sa tulo ka mga tawo.