3 PATAY, 3 ANGOL
Mga tinun-an nabanggaan sa awto, nangahulog sa taytayan kay nangalagpot
TULO ka graduating nga mga tinun-an sa high school nangamatay samtang tulo nila ka mga kauban naa sa grabeng kahimtang sila nadasmagan sa naghaguros nga awto niadtong Huwebes sa alas 4:05 sa hapon sa national highway sa Barangay Poblacion, Boljoon, habagatang Sugbo.
Ang managhigalang sila si Judy Ann Lomera, 18; Cristy Maie Estella, 18; ug Joanne Marie Romero, 16, mga tinun-an sa 4th year sa Boljoon National High School, nangamatay tungod sa grabing kadaot sa kalawasan.
Si Christy Marie namatay diha-diha samtang sila si Romero ug Lomera nangamatay sa Chong Hua Hospital.
Grabe ang kahimtang nila ni Kent Marie Mendez, 14; Melissa Mendez, 14; ug Nice Ancheta, 15, pulos grade 8th sa nahisgutang tunghaan.
Ninglandig sab sa tambalanan dinhi sa dakbayan sa Sugbo sila si Al-Dhineer Sanaani, 26, minyo, medical representative, taga Visitacion street, Sambag 2, dakbayan sa Sugbo, driver sa Toyota Vios (TCQ-652) ug ang kauban nga si Kristine Joyce Batucan, 26, minyo.
Sila si Sanaani ug Batucan pulos mga kawani sa Manirini Philippines Inc.
Gikan sila sa Dumaguete City nga namaligya sa ilang mga tambal ug padulong mopauli dinhi sa dakbayan sa Sugbo.
Si SPO3 Roderick Roma, imbestigador sa Boljoon Police Station nga nahinabi sa dySS Super Radyo ug
Sun.Star Superbalita, nagkanayon nga padulong sa dakbayan sa Sugbo ang mga medical representative.
Ang mga biktima padulong sab mopauli gikan sa tunghaan samtang naglakaw sa left lane sa karsada dihang kalit nga gidaro sa naghaguros nga Toyota Vios.
Si Sanaani nga giimbestigar sa kapulisan niingon nga samtang nagsubay sila sa national highway, iyang nabantayan nga duna silay naagian nga hump hinungdan nga hapit maderetso ang sakyanan sa tuong kilid sa taytayan.
Gidali niya sa paglubag ang manobela paingon sa walang habig sa karsada apan tungod sa kakusog sa dagan ug kakalit sa panghitabo, iyang nadasmagan ang unom ka mga tinun-an nga naglakaw sa pikas lane.
Ang mga biktima nangatagak sa taytayan ug ningtugpa sa dagkong bato sa ubos human sila nalagpot tungod sa kakusog sa impact sa pagkabangga.
Ang awto nabalitok ug nahayang sa gutter sa taytayan hinungdan nga naangol sab ang driver ug pasahero apan di kaayo grabi.
“Kusog gyud kaayo ang impact kay nalagpot silag (mga biktima) 12 ka metros unya nahagbong sa taytayan. Nitugpa sa mga bato hinungdan nga grabing kadaot sa ulo nila ug kalawasan,” dugang ni Roma.
Si Sanaani nibutyag nga mipadagan lang siyag 70-80 kilometros matag oras niadtong higayuna dihang naigo niya ang unom ka mga tinun-an.
Gipadayag ni Roma nga way hump ang maong lugar ug posibling sa kakusog lang sa pagpadagan niini nga nagdali mao nga nikawat sa pikas lane si Sanaani ug naigo ang mga biktima.
Bisan kon nalandig sa tambalanan ang driver ug pasahero, giatiman gihapon sa ilang pamilya ang mga biktima nga naa sab sa tambalan dinhi sa dakbayan sa Sugbo.
“Mga arangan gyud untag utok kadtong mga nangamtay nga mag bestfriend sumala sa mga magtutudlo. Pero unsaon disrasya gyud ang nahitabo.” Nagkanayon si Roma.
Paabuton nila ang mga banay sa mga biktima sa ilang pormal unya nga pagpasakag reklamo batok sa driver sa awto samtang under arrest nila karon bisan naa sa tambalanan sa dakbayan sa Sugbo.