VIDAL MIAWHAG SA MGA SUGBOANON SA DI DAYON PAGTUO SA HITABO NGA MILAGRO

MOLUNGTAD pa og daghang katuigan sa seryusong pagtuon sa mga international expert sa dili pa opisyal nga modiklarar ang simbahang Katoliko nga dunay mga nagmilagro, sumala ni Cebu Archbishop Emeritus Ricardo Cardinal Vidal.

Mao kini ang gipasabot sa Cardinal labot sa giingong imahen sa Señor Sto. Niño nga nagmilagro nga nakitan sa mga bata sa Barangay Mactan, dakbayan sa LapuLapu sa niaging buwan.

Si Vidal nipahinumdom sa katawhan bugtong ang simbahan lamang ang makaingon nga dunay milagro nga nahitabo.

Siya niingon nga lisod ang proseso kay gikinahanglan nga modeklarar pa ang international medical experts nga di kasarangan ang hitabo u gang simbahan lang ang makadeklarar nga kini milagro.

Si Cebu Archbishop Jose Palma sa iyang bahin, niingon naghunahuna unta sila sa posibilidad pagpahipos sa imahen nga unang giingon sa mga bata nga mitabi ngadto nila.

“Pero wa man gyud right ang simbahan kay sila man ang nakakita,” pagpasabot niini.

Ang arsobispo nisaysay nga niadto na ang parish priest sa mga bata ug mismo kini nitugan nga di tinuod nga mitabi ang Sto. Niño ngadto kanila dihang ilang nakaplagan sa baybayon.

“So let that be for the moment...” dugang pa ni Palma.

Una niini, si Padre Benjie Balsamo, parish priest sa Santo Niño de Cebu parish sa Barangay Mactan, nihimo og pakisusi ug gihinabi ang mga bata nga unang nangangkon nga nisulti nila ang imahen.

Giangkon sa mga bata ngadto niya nga dili tinuod nga nakigsulti nila ang maong imahen nga gidala sa ilang pinuy-anan ug karon padayong gidagsa sa mga deboto.

Si Vidal, sa iyang bahin, niingon nga ang mga Pinoy kanunay nga nangita og mga talagsaon.

Si Necitas dela Rosa, inahan sa usa ka batang lalake nga gipanganak nga dunay celebral palsy nagantos paglinya aron makahikap ug mag-ampo sa giingong nagmilagro nga imahen uban sa pangaliyupo nga makalakaw na ang iyang anak.

“Palakton ang akong anak mao ra gyud ang akong giampo,” asoy niini ngadto sa TV 5 kagahapon.

Si Charice Arellano, inahan sa mga bata nga nakakita sa imahen, niklaro nga ang donasyon nga gipanghatag sa mga tawo gigamit nila alang sa pagpanindot sa kapilya ug dalan pasulod ngadto sa kapilya ingon man pagpahimo og pansayan alang sa mga deboto nga moduaw sa imahen.