District hospitals palambuon

TINGUHA ni Gobernador Hilario Davide III nga makaabot og level 1 status ang mga district ug provincial hospital nga gipadagan sa kagamhanan sa lalawigan sa Sugbo.

Kini human sa iyang upat ka adlaw nga pagbisita sa probinsya sa Pangasinan diin niobserbar siya sa maayong pagpadagan sa lokal nga kagamhanan niini.

Iyang nahibaw-ang ISO (International Organization for Standardization) certified ang provincial hospital sa maong lalawigan ug tumong niya nga mahitabo usab kini dinhi sa Sugbo.

“That’s what we’re aiming at least maka level 1 lang ta,” paambit sa gobernador sa pakighinabi sa mga tigbalita sa Kapitolyo kagahapon.

Siya nipasabot mahimong level 1 ang usa ka ospital kon duna nay kapasidad sa pagpahigayon og surgical operation.

Ang gobernador nasubo gumikan kay primary health care pa lamang ang matanyag nga serbisyo sa mga district ug provincial hospital sa probinsya sa Sugbo.

Sa iyang pagduaw sa provincial hospital sa Pangasinan, iyang naobserbahan ang kamahinungdanon sa pagbutang og mga medical staff nga dunay dedikasyon sa pagpanerbisyo.

Iya usab nakita sa maong tambalanan ang kalimpiyo niini ug kumpleto sa kagamitan sa pagpanambal.

Si Davide niasoy nga nagkaestoryahanay na sila ni Health Secretary Enrique Ona bahin niini atol sa iyang pagbisita sa buhatan sa kalihim sa miaging adlaw sa kaulohan.

Kauban niya sa tigom sila si Department of Health-7 Director Jaime Bernadas, Provincial Board Member Peter John Calderon, chairman sa committee on health sa PB ug Provincial Health Officer Cynthia Genosolango.

Matod niya nisaad si Ona nga motabang ang DOH pagpalambo sa health services sa mga district ug provincial hospital sa Sugbo.

Apil na niini ang pagpalit og dugang ekipo ug paghatag og technical advise sa ahensiya sa Kapitolyo.

Ang gobernador nipahibawo sa sunod semana magtagbo sila si Bernadas alang sa pagplano ug pagtan-aw sa kahimtang sa mga district ug provincial hospital sa Sugbo.