DepEd 7 nagpaabot sa pundo

HALOS tulo ka buwan na ang nakalabay human gigusbat sa bagyong Yolanda ang amihanang Sugbo, ang Department of Education sa Central Visayas nagpaabot pa sa ipagawas nga pundo gikan sa nasodnong kagamhanan alang sa pagpaayo sa mga lawak saringan nga nangaguba sa kalamidad.

Samtang, pito ka mga higher education institution sa amihanan sa Sugbo ang apektado sa super typhoon, sumala sa Commission on Higher Education sa rehiyon.

Si Victor Yntig, physical facilities coordinator ug focal person on disaster and risk reduction management sa DepEd 7, nibutyag nga niabot og P699.234 milyones ang kantidad sa kadaot nga gibilin sa super typhoon sa mga tunghaan nga sakop sa Cebu Province Division.

Wala pay labot niini ang P93.550 milyones ubos sa DepEd Bogo City Division.

Sa kinatibuk-an, dul-an 2,000 ka classrooms ang kinahanglan ipaayom-ayom sa amihanang Sugbo.

Atol sa post-Yolanda press briefing sa miaging adlaw sa Armed Forces of the Philippines-Central Command headquarters, si Yntig nipahibawo nga 356 ka mga tunghaan ang apektado sa bagyong Yolanda.

Matod niya, nasumitir na nila ang program of works alang sa rehabilitasyon sa unang 16 ka mga eskwelahan.

“As soon as possible ila nang ma-release so that we can proceed with the rehabilitation,” siya nagkanayon.

Siya nipasabot wa dayon mapagawas ang pundo tungod kay kinahanglan pa sila mohimo og program of works nga giandam sa mga kwalipikadong enhinyero ug iduso sa kaulohan.

Ang DepEd dunay P800 milyones nga Quick Response Fund nga maoy gamiton alang sa pagpaayo sa nangagusbat nga mga classroom.

Si Yntig namahayag nga nipatuman sila og sistema aron dili magdoble ang gahin alang sa mga tunghaan nga apektado sa bagyong Yolanda.

Siya nidugang nga P10 milyones nga kantidad sa mga children ug teachers’ kit ang nahatag sa United States Agency for International Development (Usaid) nga giapudapod ngadto sa mga apektadong tinun-an sa amihanan sa Sugbo.

Sa samang briefing, si Leonardo Tanael, education supervisor sa Ched 7, nipahibawo nga P40 milyones ang gibiling kadaot sa bagyong Yolanda sa 7 ka mga HEI apil na ang mga pacilidad niini.

Ang maong mga eskwelahan nahimotang sa mga lungsod sa Medellin, Madridejos, ug Poro ingon man sa Bogo City.