Public consultation ipahigayon
USA ka public consultation ang himuon sa Committee on Higher and Technical Education sa Kongreso sunod semana nunot sa hisgutanan pag-usab sa academic calendar sa mga tunghaan lukop sa nasod.
Gikan sa naandan nga pagbukas sa klase sa buwan sa Hunyo, ang UP System ug ang Ateneo de Manila University (AdMU) mopatuman na sa class opening sugod sa buwan sa Agusto karong tuiga.
Ang chairman sa Committee on Higher and Technical Education, Kong. Roman Romulo, kinsa niduaw sa Sugbo kagahapon, miingon nga tumong sa konsultasyon ang pagpaminaw sa tanang education stakeholder labot niining nakontrobersiyal nga pagusab sa academic calendar.
Dugang ni Romulo, kinahanglang maaddress ang mga problema nga posibleng motumaw tungod niini sama sa displacement unya sa mga tinun-an.
Bisan og dunay academic freedom ang mga tunghaan, nagtuo si Romulo nga kinahanglan masabutan gihapon ang labot sa bag-ong class opening aron nga dunay hiniusang baruganan labot niini.
Ang pagpatuman sa bag-ong class opening gihimo alang Asean Integration aron susama na ug school calendar ang Pilipinas sa mga silingang nasud niini. Gawas niini, giingong gitumong sab kini aron kalikayan ang mga bagyo.
Apan ang educator nga si Atty. Jonathan Capanas nagtuo nga kinahanglang ang gobiyerno mismo maoy mo- regulate sa pagusab sa academic calendar.
Matod niya, angayang dunay balaod alang niini aron nga uniporme ang pagpatuman sa maong lakang.
Dinhi sa Sugbo, bugtong ang University of the Philippines (UP) Cebu Campus pa ang mopatuman sa bag-ong academic calendar ug wa pay lain tunghaan dinhi nga mipadayag sa pagpatuman usab sa bag-ong schedule.