Bohol nagkinahanglag $6.6 M alang sa pagbarog balik
TAGBILARAN CITY – Nagkinahanglan ang Bohol og labing menos $6.6 milyones aron matiwas ang gikinahanglang tabang aron mapabarog ang mga balay sa mga nabiktima sa linog sa Bohol.
Apan, niangkon ang mga international organization nga naglihok sa Bohol nga apektado ang relief ug rehabilitation efforts sa lalawigan nga naigo sa linog human matutok ang atensyon sa mga donor ngadto sa biktima sa bagyong Yolanda.
Ang International Organization for Migration sa ilang website nipadayag nga kaniadto sa wa pa ang bagyo, haruhay ang pag-abot sa international nga tabang sa Bohol human sa linog hangtod nga mikuso-kuso ang Yolanda.
Paglurang sa bagyo, dako nga pahat sa international nga tabang alang sa Bohol mikibra aron ipanghatag ngadto sa Tacloban ug kini na ang sinugdan sa hinay nga pag-abot sa tabang.
Sa ilang hand-outs, laing organization, ang Shelter Cluster nga maoy naghimo og coorination alang sa pagpabarog og kapasilongan sa katawhan ug ang lokal nga pundok nibutyag nga tulo ka buwan human sa grabeng linog nga niigo sa Bohol, kapin sa 200,000 ka tawo ang nanimuyo ilawom sa mga tent.
Kahinumduman nga ang linog sa Bohol niguba sa kapin 76,000 ka kabalayan. Gani, ang uban niini di na mahimong kapuy-an pa pag-usab, matod sa ClusterShelter.org pinaagi ni Birgit Vaes sa Belgium ug maoy shelter cluster coordinator sa Bohol.
Tulo ka buwan human sa kalamidad, daghan pang pamilya ang nagbalikbalik sa ilang mga tent ug sa naguba ug delikadong mga balay bisan sa kakusog uwan ug aftershocks, midugang ang organisasyon.
Niini, gipadayag sa Shelter Cluster ang dinali-an nga panginahanglan sa 6.6 milyones dolyares nga dugnag pondo alang sa pagpabarug sa gikinahanglang shelter sa Bohol, matod sa Shelter Cluster.
Mismo si Paul Jock sa United Nations Office for the Coordination of Humanitarian Affairs nipasabot nga dayag nga mihinay ang pag-abot sa tabang alang sa Bohol human sa bagyo.