Mga bunkhouse ipanghatag na

ORMOC CITY - Andam na nga i- turn over sa Department of Public Works and Highways (DPWH) 4th Leyte Engineering District ang 24 ka unit nga bunkhouse nga anaa sa Barangay Canuntog ning dakbayan.

Si DPWH 4th LED Engr. Lino Francisco Gonzales nagkanayon nga 100 porsiyento na nga nahuman ang mga bunkhouse didto sa naasoyng barangay ug mamahimo na kining puy-an sa mga biktima sa bagyong Yolanda.

Midugang si Gonzales nga buot na nilang i-turn over ngadto sa Department of Social Welfare and Development (DSWD) 8 ang mga bunkhouse apan hangtod sa paghimo ning balita wa pay nadawat nga positibong tubag ang DPWH 4th LED.

“Gusto nami mo-turn over, sila among gipaabot taga DSWD, actually, tungod man gud na sa isyu lage nga overpricing, substandard. Tungod ana nga isyu ba conscious kaayo sila pero before that, sa wa pa na nga isyu gigil na kaayo sila nga mo- take over,” padayag ni Gonzales.

Bisan niini dako ang paglaum ni Gonzales nga maturn over na ang mga bunkhouse sud ning buwana.

Sa milabayng buwan, gi- turn over na ngadto sa kagamhanan ning dakbayan ang 22 ka unit nga bunkhouse didto sa Barangay Concepcion apan hangtod karon wa pa kini papuy-i niadtong gatusan ka mga pamilya nga biktima sa bagyo.

Si City Engineer Ranulfo Oliveros mitataw nga duna pay idugang nga development sa mga bunkhouse sa Concepcion sama sa pagpamintal aron mamahimong color coded ang matag bunkhouse.

Duna usab plano ang kagamhanan nga kon daghan ang miyembro sa pamilya ila nalang butangan og pultahan ang division sa duha ka kwarto nga nagtapad kini base na usab sa gisugyot sa DPWH 4th LED aron di na dako ang trabahuon.

Ning tungora wa pa masayod si Oliveros kon kanus-a pabalhinan ang mga bunkhouse sa Concepcion.