Inday, sibog-sibog dyutay!
MANGITA’G kalutsan, kabalo maningkamot. Labi na’g ang nasod gapabiling wa’y nahot, ang ubang kababayenan dili gyod pasagdan ang kaugalingon nga magtingkagol sa kaminghoy ug igo na lang mangutkot bisan pa’g wala sila gikatlan.
Kagiron gyod ra ba ang kahigayonan. Mao nga bisan pa’g nalabhag ang lawas sa uwat—sarang gamatuod sa lisod nga kahimtang nga lupi’g pa’y ilagang pawot—naa’y mga inday nga mapangahason pagdawat sa bisan unsa’y ipabuhat sa ilaha. Mao bitaw nga dili gyod malilong ang gidangatan sa ilang pagkatanggong, bahala’g sawayon pa sila nga humok og ilong.
Mosimhot gyod pag-ayo kon asa ug unsa ang mga pamaagi sa paglingkawas. Naa’y uban nga gapaumod na lang sa kaugalingon diin galunang ang mga butakal. Puslan man, hala, pasagdan na lang ilang pagkasugamak sa kamot sa mga bugaw. Naa po’y uban nga galumpayat gyod nga aswaton sa bisan kinsang langyaw nga gituohan nilang mopadangat nila’g bago ug haruhay nga kinabuhi. Bahala na lang kon tawgon pa silang biktima sa panamastamas kun dili man gani samotan sa ilang kaalaot samtang pasanginlan nga sila’y namiktima. Gani, naa’y mga ginikanan nga niunay kuno pagdasig sa ilang mga anak nga mangwarta pinaagi sa pagpasundayag sa ilang panit ug pagkuyog sa mga langyaw nga gitan-aw nilang adunahan. Pwera buyag, sila kuno mga oportunista!
Palaran ang makakuot sa lawom nga bulsa. Dayag nga kini mao’y pagtuo sa mga nalambigit sa gikataho nga mga hinanggaw sa mga dapit dinhi sa Sugbo nga gahitak kuno sa ginadili nga patigayon sa cybersex gawas pa sa mail-order brides. Ingon ining paagiha ang pagbaligya sa kadungganan sa atong kababayenan—kasagaran mga linghod pa’g unod—sumala pa sa tigpatuman sa balaod nga giuyonan pod sa mga moralista. Dakong kalapasan kuno ang paglawog sa atong kababayen-an sa mga sapian bisan asa.
Padulong sa upat ka suok sa kalibotan, wa’y kurat atong mga inday nga lakip sa lunop sa mga nanimpalad sa laing dapit diin gidamgo nga labing lunhaw ang balilihan nga masibsib. Gani, gidayeg pa sila nga lakip sa gitawag nga “bag-ong mga bayani” tungod sa gipadala nilang kaayohan sa ilang kabanayan. Sa ato pa, samtang naahat sila pakigharong sa bisan unsang matang sa kakuyaw sa ilang paglangyaw, giaghat pod sila sa kagamhanan nga magpadayon sa ilang paghaw-as sa nasudnong ekonomiya pinaagi sa pag-ambit sa bunga sa ilang pasingot. Ay, dayag nga taphaw ra ang pagsuki batok sa mga patigayon nga cybersex ug mail-order brides samtang padayon ang nasod ug ang atong kadagkoan sa ilang pagtukmod ug pag-awhag sa mga inday sa bisan unsang pamaagi—tinarong kun pabadlong —sa panikaysikay aron mosibog ug mouswag.
(geemyko@gmail.com)