Ang pamahayag ni PNoy

ANG pagluwat og pamahayag ni Presidente Benigno Aquino III kalabot ning kasungian sa West Philippine Sea tali sa Pilipinas ug China makapasamot na hinuon sa kainit sa sitwasyon sa duha ka nasod.

Si Aquino, sa interview sa mga journalist didto sa Estados Unidos, mipadayag nga ang gihimong pagpangangkon sa China sa West Philippine Sea way kalahian sa gihimo sa imperialismong si Adolf Hitler sa Nazi Germany niadtong 1938 diin giangkon usab niini ang pipila ka bahin sa Czechoslovakia.

Ambot og unsay rason ni Aquino sa iyang kontrobersiyal nga pamahayag nga daw sa iya na man hinuon giguba ang tinguha nga dili unta modako kining territorial tension sa China ug sa atong nasod.

Tinuod nga saludo ug misuporta kita sa pagdepensa sa atong katungod sa teritoryo nga iya sa atong nasod apan ipatugbabaw unta nato ang usa ka diplomasiya ug malinawon nga paagi aron pagkab-ot sa tiunay nga solusyon.

Ang uwahing pamahayag sa presidente di makatabang sa peaceful nga solusyon sa maong kasungian ug sa iyang gibuhat susama ra nga iyang gisabligan og gasolina ang nag umido nga kainit sa kayo aron kini moulbo.

Isip pangulo sa nasod, maampingon ug mabinantayon unta gyud siya sa iyang mga pamahayag o mga pamulong aron dili makapainit sa pikas nga habig. Tungod sa iyang gibuhat, ang masuk-anon nga China mibawos sa pagtawag kaniya og usa ka amateurish nga politiko ug ignorante nga pagka-presidente.

Ang gibuhat ni PNoy dakong sukwahi sa gipamulong sa iyang amahan nga si Senador Ninoy Aquino nga nagkanayon “the wrong does not right the wrong.”