CVRAA 2014
MGA pahalipay alang sa taga Department of Education Cebu City Division nga gipangulohan ni Dr. Rhea Mar Angtud sa ilang malamposon nga pagpahiluna sa mga atleta nga mosalmot sa Central Visayas Regional Athletic Association kun CVRAA. Ang Cebu City Division maoy host karong tuiga. Ang katapusang sports event sa DepEd nga ang Cebu City maoy host nahitabo niadtong 1994 atol sa pagpahigayon sa Palarong Pambansa.
SURVIVORS
Lakip nga nisalmot mao ang atleta nga matawag nato nga mga survivors sa mga katalagman sama sa makalilisang nga linog sa Sugbo ug Bohol niadtong Oktubre 15, 2013 ug ang bagyong Yolanda niadtong Nobyembre 8 sa samang tuig. Dunay daghan ang nagutana kon asa nila makita kining maong mga athletes. Ang delegasyon sa Bohol nga mga biktima sa linog tua gipasilongan sa Zapatera Elementary School. Ang mga atleta nga biktima sa bagyong Yolanda sama sa Bantayan, Daanbantayan, Medellin, Sogod, Borbon, San Remegio ug Tabuelan tua gipahiluna sa Labangon Elementary School. Ug ang taga Bogo City tua magpahulay sa Banilad Elementary School. Sa akong pagduaw sa maong mga athlete nalipay nga nakabati sa ilang gisulti nga way epekto sa bagyo o linog ang makapaliya nila pag-angkon og gold medal atol sa competition. Matod nila ang ilang pagsalmot kabahin sa proseso sa pagbangon gikan sa mga trahedya nga ilang naagi-an.
BANGON
Sigun sa asoy sa mga atleta nibiya sila sa ilang probinsya aron mosalmot sa CVRAA nga nagyaka pa ang ilang mga panimay sa yuta tungod sa trahedya. Pananglit si Marycris Apuyan nga taga Danao, Bohol. Siya ni-asoy nga wala pa gyud sila makabangon human sa linog. Guba ang ilang balay ug sa ilang mga silingan. Apan wala siya magduhaduha pagsalmot kay gusto niyang ipamatuod nga sa bisan sa natad sa paugnat sa kusog masayran sa katawhan nga sila andam nga mobangon gikan sa kalisdanan.
PALIHI
Petsa 8 karon sa bulan sa Pebrero. Dunay mga nisud og negosyo ginagmay man o dinagko ang nipili ning maong petsa nga maoy ilang isugod. Ang uban mosugod ron pag-abli sa ilang tindahan. Diha toy nangimbitar nako nga moabli rong adlawa sa iyang kan-anan. Diha sab toy naghisgut nga moabli ron sa iyang parlor ug barberohan. Nindot daw kay petsa 8. Para nako bisan unsang petsaha basta pangunayan nimo og dumala ug dili isalig sa uban ang panudlanan sa halin dako og kahigayonan nga molambo. Labi na kong gipaagi sa makuting pagtoon ang pagpili sa maong negosyo. Nahinumdum ko ni agaw Rico nga taga Cogon Pardo nga gitahasan pagtuon unsa ka malamboon ang negosyo sa pag-abli og fish cage sa bangus. Nasugatan niya ang daghang nindot nga kasayuran nganong malamboon ni nga matang sa negosyo. Nakadawat sab hinuon siya nganong risgo ni ilabi na kong isalig lang nimo sa imong tawo.