Gahom sa gugma
NAPATIK sa basahon “Love Never Fails” ang 50 ka mga saad sa kaminyoon. Sa “The Greatest And The Most”, ang gugma maoy gamhanang pwersa sa kinabuhi. Mao diay nga lisod tugkaron ang hinagtok sa kasingkasing ug kahulogan sa gahom sa gugma. Ning pagsaulog sa Valentines Day atong malingi ang ligid sa kapalaran ni Mabini Barangay Capt. Rey Oybenes ug sa iyang biyuda nga hinigugma si Rohamma Luage. Gigakotan sa matam-is nga pagminahalay kalit ang pagbalitok sa esena sa ilang gugma. Baha sa pangabubho mihadla nga nagtukmod sa pagkutlo sa ilang kinabuhi. Mubo ra ang pagtiti sa lawasnong kahinam apan pait ang pag-antos sa bunga sa pagpakasala. Wala molungtad ang pag-inunungay nga gipuy-an sa nagkasabot nga kasing-kasing. Apan baya ang matuod nga katagbawan sa gugma mao ang pagtinil sa gugma sa Ginoo aron dili gutom ug uhaw sa pagkamatarong. Dinhi magasukad ang gugma sa pamilya, isigkaingon ug katilingban. Samtang ang sulad nila ni Vhong Navarro, Deniece Cornejo ug Cedric Lee maoy bunga sa luhag nga kasing-kasing. Advance Happy Valentines!
* * * Tukma nga usa ka tuig karong bulana kadtong pagkatap sa sex video scandal sa duha ka mga tinun-an sa inilang kolehiyo sa Sugbo. Labaw pa sa linog nga mitay-og sa kadungganan. Hulad sa dili maayong epekto sa modernong kaplag sa teknolohiya. Dili man unta kadto eskandalo kay wala man magkabay-anay sa eskina apan ang pagsabwag sa dugosnong katamis sa sultada nga gibuhat sa tago mikatap man pinaagi sa video. Sa ilang paghingutas paglad-ok sa makatagbaw nga kalipay kalit nga gitukob ug nahimong kamandag ang pagkatkat sa bukid tadlas sa kahimayaan. Ang taghoy sa romansa maoy nakapahilo sa damgo alang sa maayong kaugmaon.
* * * Gugma sa edukasyon. Gipasidunggan si Bokal Thadeo Ouano isip doctorate degree for humanities sa pangulo sa Northwest Christian University nga si Dr. Eugene Zanderson nga nagbasi sa Mt. Dora, Florida, USA. Dakog natampo si Ouano sa mga tinun-ang kabos pinaagi sa pagtukod sa Mandaue City College nga gidumala ni Dr. Paulus Cañete. Maayo pa ang langyaw kay nakakita sa kamahinungdanon sa maong publikong kolehiyo. Baya na ba sa administrasyon sa Mandaue nga misalindot sa maong katukoran. Nahilom na hinoon ang lantugi kay ang mga protagonista naghiusa naman sa payong sa politika. Mobalik ang kasikas sa 2016 diin nag-una ang politikanhong sugilanon nga beauty ug money contest sa Mandaue. Kon dunay lalaki nga molansar, siya ang tunok sa duha ka rosas he he.