Lutong Binisaya

DAKO akong kalipay nga gi bisita ko sa atong kanhi gobernador, ug karon congresswoman Gwendolyn Garcia sa akong restaurant dinhi sa Manila. Wala pa nako siya mailaila og personal kaniadto. Sa akong tan-aw wa siya nakakaila ug naka dungog mahitungod nako kaniadto. Apan matod niya, nahisgotan lang daw ko sa usa niya ka higala sa Congress mao nga iya kong gisuroy ug giila-ila og personal kay lagi naay chef nga Bisaya ug highly recommended ang restaurant.

Nidiretso og tawag ang iya staff dihang nahisgotan ko ug sa iyang higala. Nibisita dayon sila pagka ugma. Na excite gyud ko nga mobisita siya kay dako akong respeto niya tungod sa iya mga programa sa turismo sama sa Suroy-suroy sa Sugbo.

Bisan anaa ko sa Manila, wala nako gitago ang akong pagka Bisaya. Mismo sa akong menu, daghang potahe nga Bisaya ang akong gi-offer diri ug mao pud akong giandam para ni Cong. Gwen dihang gibisita ko niya. Pwerte niyang lingawa kay ang akong welcome drink para niya kay tuba shake man. Preskong tuba, nga ako lang gi-freezer dayon gi-blender usa gi serve. Lami pa daw kay sa margarita, matod pa niya.

Akong giistorya niya nga daghan ang lami nga pagkaon sa ato, kulang lang og imagination ang tawo. Kulang lang pud og skill para madala nato sa world class level ang atong pagkaon. Ako pud siyang gisilbehan og monggos nga tinunoan, nga iyang gibahog kan-on. Adobong bisaya, pina-uga ug walay sarsa, nga usa sa among best sellers sa resto, balbacua ug bam-i. Murag naa gyud mi sa Cebu nanihapon.

Salamat, Cong Gwen, sa pag-bisita.