Benepisyo sa itlog sa pugo

ANG itlog sa pugo o buntog kun quail egg puno sa bitamina ug mineral. Bisan pa man sa kagamay niini og gidak-on, mas daghan kini og nutritional value itandi sa itlog sa manok.

Ang itlog sa pugo dunay 13 porsyento nga protina samtang ang itlog sa manok duna lay 11 porsyento.

Duna say 140 ka porsyento nga vitamin B1 ang itlog sa pugo samtang ang itlog sa manok duna’y 50 porsyento lamang.

Kon itandi gihapon sa itlog manok, ang itlog sa pugo makahatag og lima ka beses nga gidaghanon sa iron ug potassium . Nasuta usab nga ang mao nga itlog di maka-allergy sa tawo.

Makatabang kini sa pagpugong sa bisan unsang allergies tungod kay duna kini’y ovamucoid protein.

Ang regular nga pagkaon niining mao nga itlog makatabang sa paglikay o pakigkombate sa mga nagkadaiyang sakit nga mamahimong makuha sa tawo. Sagad nga mapugngan niini mao ang ulcer sa tiyan. Makapalig-on usab kini sa immune system ingon man sa nervous system ug makapa-usbaw sa memory health.

Alang sa mga duna’y anemia, makatabang gihapon ang itlog sa pugo sa pagpataas sa level sa hemoglobin sa lawas samtang kuhaon sab niini ang mga toxin ug heavy metals sa lawas.

Gani, naandan na sa mga Chinese ang naggamit sa itlog sa pugo aron sa pagtambal sa tuberculosis, asthma, ug diabetes. Dako sab kini og matabang alang sa mga nag-antos og bato sa kidney, atay, ug apdo tungod kay makapugong ang pagkaon sa itlog sa pugo nga makabaton ka og bato sa kidney o kuhaon niini kon naa man.