This one’s for you
MITABANG si Marilou sa akong paglutog sud-an. Five in the afternoon ni-adtong higayona. Kami rang duha si Marilou sa balay namo sa Escario kay nanimba si mama ug papa. Kon parehas karong adlawa nga Sunday, sa misa sa hapon manimba ang among parents ni Marilou.
“Asikasoha na nuon ang imong kaugalingon, Marilou, kay basig sayong moanhi si Jeric.” Gikidhatan ko ang akong manghod. Mipakibo siya sa iyang abaga. “Makita ko na gyud ang imong boyfriend, Marilou. Guwapo ba siya?” “Super guwapo gyud, Ate Shiela. Na, buotan pa gyud.” “Aw, pareson gyud diay mo. Guwapa ka man sab, Malou.” “Sus, ako ra diay. Daghan baya ang nag-ingon nako nga mas guwapa ka.”
“Gikumedyahan ka lang nila, uy, Malou.” Pero sa hilom nalipay ko sa giingon sa akong igsuon. Pero lupig gyud ko niya kay nag-eskwela man siya sa college, samtang ako, kutob ra sa paggradwar sa hayiskol.
Nahilom sa Marilou. Morag lawom kaayu ang iyang gihunahuna. Gidagpi kog hinay ang iyang mga abaga. “Naunsa ka, uy, Malou? Mora ka man napaakan og bitin?” “May gihunahuna lang ko, Te. Aw, ayaw nig hunahunaa, uy.” “Nahibawo ko sa imong gihunahuna, uy, Malou. Nabalaka ka, no, nga di magkagusto ang atong mga ginikanan kang Jeric? Sus, ayaw paghunahuna ana, uy. Buotan man kaha siya?”
Miyangu-yango si Marilou. Unya nananghid siya nga maligo. Gipahiyoman ko ang akong manghod. Samtang ako na lang usa sa kusina, nahunahuna ko ang akong kaugalingon. Duha ra ming magsuon si Marilou. Gipaundang una kog eskuwela sa akong parents ug si Marilou ang ilang gipapadayon sa college.
Sickly man gud ko. Kanunay lang kong magkasakit. Medyo luyahon ko. Tulo ka tuig na kong nakaundang og eskwela. Pero na lagsik na ko karon. Mahimo na kong moeskwela. Pero kagustohan nako nga pahumahon na lang gyud sa college si Marilou una ko motungha. Manghod kog usa katuig si Marilou.
Gabii na sa pag-abot ni mama og papa. Nakahuman na sab kog luto. Ako ang kusinera og labandera. Pero usahay si Mama ang maglaba kay di siya gusto nga mahago ko pag-ayo. Pulos dunay trabaho si mama ug papa.
Unya ni abot si Jeric. Sus, wa gyud diay magbakak si Marilou. Super guwapo jud si Jeric. Mapahiyumon pa kaayo. Unya gipaila-ila ni Marilou si Jeric ug ang among parents. Pagkahuman, ako na sab ang gipaila sa akong manghod kang Jeric. Namugnaw ang akong palad dihang gilamano ko ni Jeric.