Nakaamgo na
Dear Noy Kulas,
Ang akong problema mao ang epekto sa akong pagka playboy kaniadto samtang batan-on pa ko. Tagoa lang ko sa ngan nga Mr. P, 31 years old.
Human nakog graduate sa college, nakauyab ko sa akong unang gitrabahoan. Bunga sa kainit sa among edad, mimabdos ang akong uyab bisan di pa ko ready sa responsibility isip amahan. Ni- resign ko sa kompaniya aron makalikay ko sa babaye.
Nilarga ko sa Manila ug didto nakauyab ra ko og lainlaing babaye. Wa na ko nakahibawo unsay nahitabo sa akong ex-girlfriend ug sa among anak until pag-uli nako diri sa Cebu last year, nagkasugat mi sa usa ka mall. Naminyo na diay siya ug ang iyang bana maoy nangamahan sa among anak nga ilang kuyog niadtong higayuna. Nakahibawo ko kay tulo ang ilang kuyog nga mga bata ug gipaila nila nga eldest.
Wala ko makasabot sa akong gibati dihang nakakita ko sa among anak nga dako na. Naglisod ko pagkatulog human ko makakita sa bata. Akong na- realize nga kanindot diay sa bation sa lalaki kon makakita sa iyang liwat. Pero maglisod na ko sa pagpaila sa bata kay ang iyang nailhan mao ang iyang ama-ama karon nga sa akong tanaw, nagmahal niya isip tinuod nga anak.
Unsa may akong buhaton, Noy Kulas? Makapaila ba ko nga ako ang tinuod nga amahan? Di kaha sila masuko? Please tambagi ko.
MR. P
Mr. P,
Maayo kay nakaamgo ka nga nindot ang bation sa usa ka lalaki nga makakita sa iyang anak. Unfortunately, di tanang mga lalaki ingon ana.
Pakigsultihi ang imong ex-girlfriend ug ang iyang bana nga ganahan ka nga magpaila o makig-ila-ila sa bata. Kon di sila mosugot, ayaw na lang pamugos, labina kon makadisturbo kini sa ilang pagpuyo ug sa bata. Mas maayong maghuwat ka sa hustong panahon. Kana bang hingkod na ang inyong anak ug makasabot na sa sitwasyon.
Ingna angbana sa imong kanhi uyab nga wa kay intention sa pagsamoksamok ug pagpangayo og pasaylo sa imong exgirlfriend sa imong gibuhat kaniadto nga iresponsable ug tinalawan kaayo. Obserbahi ug dawata kon unsa ang ilang reaction. Again, kon di gihapon sila makauyon, dawata ug palabya ang sitwasyon kay imo man sab nang sala. Consequence na sa imong gibuhat kaniadto.
Lain baya sab nga mamugos ka human mo biyai ang imong uyab mga usa ka dekada. Di lalim ang pagpadaku og bata kay lisod kaayo samtang ikaw nagsige og sawom sa mga kama uban sa lainlaing babaye. Dako kaayo ang responsibilidad sa usa ka ginikanan ngadto sa iyang anak nga wa nimo mahatag. Busa angayan lang sab nga di ka magsamok sa malinawon nilang pagpuyo kon di pa sila andam ning higayuna. Dawata kon unsa ang ilang desisyon.
NOY KULAS