Menor de edad
Dear Atty. Joan,
Twelve years old ko karon ug gisugyot sa akong mama nga mosuwat kanimo aron magpatambag.
Ang akong lolo usa ka Insik ug atua na karon nanimuyo sa Hong Kong. Iyang gipadalhan og kwarta ang akong mama aron iplite nako sa pag-adto sa Hong Kong aron moduaw siya. Usa raman ko ka apo mao nang gimingaw daw sila sa akong lola nako. Tungod ang iplite nga gipadala sakto lang sa usa ka tawo, ang akong mama di makakuyog. Timing pod kay ang bestfriend sa akong mama moadto pod sa Hong Kong mao nang nagsabot nalang nga kuyog ko niya sakay sa ayroplano kay sugaton man ko sa akong lolo ug lola sa airport.
Mahimo ba ni? Naa bay mga papeles nga andamon sa akong mama?
Aiza Dear Aiza,
Istrikto ang atong balaod sa pagbiyahe sa gawas sa nasod sa usa ka menor de edad sama nimo nga di kuyog ang iyang inahan o amahan. Nakasulti ko nga istrikto kay naa mga papeles nga ipresentar aron ang imong pagbiyahe legal ug aron di ka mahimong biktima sa gitawag nato nga “attempt to commit child trafficking” ubos sa RA 7610. Ubos sa RA 7610, adunay “attempt to commit child trafficking “kon ang bata nag-inusarang nagbiyahesa laing nasod nga way permit gikan sa DSWD o suwat nga magpamatuod nga uyon ang iyang mga ginikanan sa pagbiyahe sa bata.
Ubos ining balaod, usa ka salaod ang pagdala sa usa ka menor de edad sa ubang nasod kon way igong dokumento nga mapresentar.
Tungod kay ikaw magbiyahe gawas sa nasod kuyog ang best friend sa imong mama, kinahanglan makapresentar siya og dokumento nga nagkonsente ang imong ginikanan sa imong pagkuyog kaniya.
Kon siya di makapresentar ini nga dokumento, mahimo siyang madakop ug mapasakahan og kaso ubos sa RA 7610 nga “attempt to commit child trafficking”.
Ang kinahanglan nga buhaton sa imong mama mao ang pag- execute og affidavit of consent to travel ug kini kinahanglan notaryuhan sa usa ka abogado. Sa kini nga affidavit of consent to travel, gitugyan sa imong inahan ang imong pagbiyahe gawas sa nasod sa best friend sa imong mama ug sa siya nisugot nga ipakuyog sa iyang bestfriend sa Hong Kong.
Enjoy sa imong pagsuroysuroy sa Hong Kong.
Atty. Joan