Uyon sa naturalization
NAKADAWAT kita og suwat pinaagi sa atong email add gikan sa atong batid nga tigbasa ug mipadayag sa iyang panahom kalabot niining pag naturalized sa duha ka mga NBA players aron makaduwa sa Gilas-Pilipinas team alang sa World Cup karong Septiyembre didto sa Spain.
Tungod sa kataas sa iyang suwat, di nato mapatik ang kinatibuk-ang unod niini apan hinuon atong hatagan og igong luna ang mga importanting punto nga iyang ipasawo kanato.
Ang maong suwat gikan sa usa ka Jose Clepidio sa lungsod sa Minglanilla niadtong Pebrero 4:
******* Maayong Buntag Sir;
Nakabasa ko sa editoryal sa Superbalita ug sa imong lindog mahitungod sa naturalisasyon sa duha ka Amerikanhong basketbolista, si Javale McGee sa kuponan sa Denver Nuggets ug Andray Blatche sa kuponan sa Brooklyn Nets.
Daghan ang miuyon niining maong katuyoan, apan aduna usay pipila nga misupak. Sumala pa, gipangulohan kining maong pagsupak ni Atty. Estenzo ug gidasonan ni Tiukinhoy. Matod pa nila, kining maong pagnaturalisar sa duha ka giingong basketbolista usa ka pagduwa-duwa sa atong citizenship ug daw sa wala na kini hatagig igong bili.
Tugoti ko sa paghatag ning akong panahom mahitungod niining maong isyu, ilabi na kalabot sa komentaryo ni Atty. Estenzo ug Tiukinhoy. May punto sila. Apan sa akong tan-aw niining sitwasyona, dili pa kita makaingon nga giduwa-duwaan lang ang atong citizenship.
Makaingon ta nga giduwa-duwaan lang ang atong citizenship kon gamiton ang naturalisasyon alang ni bisan kinsa lang nga tawo nga tagalaing nasod ug ingon man kon walay igong hinungdan sa paghimo sa ingon.
Pananglitan: bisan kinsa lang nga tawo sa Amerika i-naturalize lang dayon sa way igong katarongan. Kini maoy maingon natong duwa-duwa lang sa atong citizenship.
Apan ang balaodnong gipangamahanan ni Kong. Robbie Pono naghupot sa duha ka rason nga gisitar sa ibabaw.
Si Javale McGee ug Andray Blatche mga sakop man sa nag-unang liga sa basketbol sa kalibotan nga mao ang NBA. Di man kay si bisan kinsa lang na silang mga tawhanang gipangnaturalisar.
Ug adunay dakong katarongan nganong inaturalisar silang duha. Dili nato ikalimod nga ang kuponan sa basketbol sa Pilipinas dili gyud makasugakod sa mga kuponan sa laing kanasoran nga mosalmot sa FIBA World Cup karong umaabot nga Septiyembre.
Dayag nga ang kuponan sa Pilipinas nagkinahanglan og big men. Dili igo si Marcus Dauthit, ilabi na nga may pangidaron na kini. Mao kini ang dakong rason ngano nga inaturalisar sila si McGee ug Blatche.
Tinuod nga aduna kitay big men sama nila ni Greg Slaughter ug June Mar Fajardo apan dili pa gyud makasugakod ang ilang abilidad batok sa mga big men sa ubang kanasaroran.
Busa, usbon ko, uyon ko nga inaturalisar sila si McGee ug Blatche tungod sa rason nga ako nang gikasulti sa unahan. Daghang salamat.