SPURS WA KALAHUTAY
Gikunis-kunis sa Nets; Bulls giputla’g sungay sa Warriors
GIMUGNA ni Alan Anderson sa 2nd half ang 19 sa iyang kinatibuk-ang 22 puntos aron tabangan ang hosts Brooklyn Nets sa paglampornas sa kuwang og tawo nga San Antonio Spurs, 103-89, kagahapon sa National Basketball Association (NBA).
Bisan wala ang ilang mga sinaligan nga sila si Tony Parker, Tim Duncan, Manu Ginobili ug Kawhi Leonard, nakasukol gihapon sa nag-unang tulo ka quarters. Gani igo lang silang naggukod og lima ka puntos sa sayong bahin sa 4th quarter.
Sa ngadto-ngadto, wala nakalahutay ang Spurs ug ningbulhot na lang ang opensa sa Nets.
Si Deron Williams nidugang og 16 puntos alang sa Nets, nga ningputol sa unom nila ka sunudsunod nga kapildihan batok sa Spurs gikan pa niadtong 2010.
Sa miagi nilang duwa, nasugakod sa Spurs ang grabe ka lisod nga pagsuway nga kuwang ang ilang puwersa ug ilang nabuntog ang Washington Wizards, 125-118, pinaagi sa double overtime apan wala sila nakasugakod sa nagkakuyaw na nga Nets. “I’m disappointed we didn’t win,”
asoy ni Spurs coach Popovich. “I’m thinking we make a couple of 3s in the second half and we hang right in there, and that’s the way you’ve got to look at it.”
Ang Spurs gipangulohan ni Corey Joseph pinaagi sa iyang 18 puntos, nidugang og 17 puntos si Dannu Green samtang niamot og 16 puntos si Patty Mills.
GOLDEN STATE 102, CHICAGO 87
Nagpakatap og 34 puntos ug siyam ka assists si All-Star pointguard Stephen Curry samtang nidugang og 22 puntos si Klay Thompson sa dominasyon sa hosts Golden State Warriors batok sa Chicago Bulls.
Ang Warriors ningkombati nga wala ang ilang big men nga sila si Andrew Bogut ug David Lee hinungdan nga ningsandig silag maayo sa ilang pambatong guard tandem. Si Curry mitali og 13-of-19 shooting samtang si Thompson mipatik og 8-of-16.
Ang Bulls gipangulohan ni Taj Gibson pinaagi sa iyang 26 puntos ug 13 rebounds samtang nidugang og 15 puntos si Kirk Hinrich.