George moapil sa slam dunk contest

GIPANGULOHAN ni Paul George sa Indiana Pacers ang mga partisipante sa 2014 Slam Dunk Contest samtang si sharpshooter Stephen Curry maoy mangulo sa Three-Point Contest sa nagkaduol nga National Basketball Association (NBA) All-Star Weekend.

Si George ug uban pa mosuway og ilog sa korona ni defending slamdunk champion Terrence Ross sa Toronto Raptors.

Gawas kang George, ang ubang mosuway’g ilog sa slamdunk title mao sila si John Wall sa Washington Wizardl, Harrison Barnes sa Golden State Warrior, Damian Lillard sa Portland Trail Blazers, ug rookie Ben McLemore sa Sacramento Kings rookie.

Si Kyrie Irving sa Cleveland Cavaliers mosuway’g depensa sa iyang Three-Point Contest title kontra nila ni Curry, Lillard, Washington Wizard Bradley Beal, Brooklyn Net Joe Johnson, San Antonio Spur Marco Belinelli, Orlando Magic Arron Afflalo ug Minnesota Timberwolf Kevin Love.

Sa laing event, ang Shooting Stars langkuban og upat ka teams. Ang unang team lakipan nila ni Tim Hardaway Jr., Tim Hardaway Sr. ug Elena Delle Donne sa WNBA Chicago Sky, ang ikaduha mao sila si Chris Bosh, Dominique Wilkins ug WNBA Swin Cash sa Chicago Sky, ang ikatulo mao sila si Stephen Curry, Dell Curry ug San Antonio Silver Star Becky Hammon, ug ang ikaupat mao sila si Kevin Durant, Karl Malone, ug Skylar Diggins sa Tulsa Shock.

Si Lillard, kinsa naa sab sa All-Star Game isip reserba sa Rising Stars Game, mokombati sa lima ka events lakip na ang Skills Challenge diin siya maoy defending champion.